"نفسي أحج".. سيدة الرزق الحلال: "كنت بلم الأكل من المطاعم عشان آكله لعيالي"
قالت رضا سيدة الرزق الحلال، إنها تبلغ من العمر 56 عامًا، وتعمل وردتين يوميًا لتربية أولادها.
وأضافت لـ"القاهرة 24": "عندي 56 سنة، كنت بشتغل ورديتين، عشان أصرف على أولادي، وقبلها كنت بشتغل عشان أساعد جوزي".
وتابعت: "كنت بلم الأكل من المطاعم عشان آكله لعيالي، ومريت بظروف سيئة جدًا، لكن عمري مخبط على باب حد أطلب منه حاجة"، موضحة "لما بحتاج حاجة بقول يارب، بصلي بقول لربنا أنا مقصرة في حقك أوي، بس ربنا عظيم جدًا".
وتداول مستخدمو مواقع التواصل الاجتماعي، فيديو لسيدة مصرية بسيطة، ظهرت في برنامج مذيع الشارع، الذي يقدمه الإعلامي أحمد رأفت، وبعد إجابتها على سؤال المسابقة، قدم لها المذيع مبلغا ماليا، إلا أنها صُدمت قائلة: "هي كده الفلوس دي حلال..عشان أنا مشقتش فيها"، إلى أن انتشر الفيديو بسرعة البرق، نظرا لردة فعل السيدة التلقائية.
واستكملت “بقول لكل زملائي في شغل لو زعلت حد يارب يسامحني، ورضيت زملائي بفلوس من اللي أخدتها من البرنامج، عشان هما محتاجين”، مضيفة:" كل اللي ليه نصيب رضيته".
وقالت رضا:" أنا بقول كل يوم وأنا خارجة من الشغل أنت أكيد يارب عارف، عشان ربنا بيسبب الاسباب، أنا كنت بشتغل في أكتوبر وربنا جابني لنادي الجزيرة جنبي".
كما نصحت السيدات العاملات قائلة:" بقول لكل ست بتشتغل الله يعنيك، لازم الست تساعد جوزها بما يرضي الله، أنا شغالة بقالي أكتر من 30 سنة ومسحت سلالم، وعمري ما عملت حاجة تغضب ربنا".
كما أشارت إلى أمنية حياتها قائلة: "نفسي أطلع الحج، مش عاوز حاجة من الدنيا غير أن أحج حتى لو مت هناك هكون راضية".
وأردفت: "لازم نسعى ونشتغل، لو مرتبي قليل ربنا هيباركلي فيه، لازم تساعدوا ولادكم وتوقفوا معاهم".
