"شتمني بألفاظ نابية ودعيت عليه في ليلة القدر".. فنانة تشتكي محمد سامي بعد إهانته لها في "نسل الأغراب"
اشتكت الفنانة مريم سعيد صالح، من طريقة تعامل المخرج محمد سامي لها، خلال كواليس مسلسل “نسل الأغراب” والذي شاركت به وعرض في الموسم الرمضاني الماضي 2021.
وكشفت مريم سعيد تفاصيل ما حدث من محمد سامي لها، في تصريح خاص لـ"القاهرة 24"، وقالت: “محمد سامي للأسف لسانه طويل شوية، وبيزعّل ناس كتير منه وأنا اتعرضت منه للإهانة والشتيمة كتير، رغم إننا اشتغلنا سوا قبل كده كتير قبل نسل الأغراب”.
وتابعت: “في يوم من كواليس نسل الأغراب كنا بنصور وغلطت في كلمة، وبنتي كانت قاعدة وراه، فلقيته شتمني بألفاظ نابية، وقالي هخليكي كومبارس يا فاشلة، وكل ده كان أمام عدد كبير من الكاست، مما دعاني للرد عليه وقولتله أمام الجميع لو أنا فاشلة جبتني ليه، وبعدين أنت اللي جبتني ولو أنا فاشلة فأنا ممكن أمشي بدون من نغلط في بعض، فرد عليا وقالي إحنا صورنا يوم وهدفعك غرامة اليوم ده”.
إيقاف محمد سامي
وأضافت: “بنتي قامت واحتدت عليه وقالتله إزاي تقولها كده، فأنا أخدت بنتي وخرجتها من اللوكيشن علشان الموضوع ميكبرش، لإني لو كنت احتديت في الحديث معه، كانوا كل الموجودين هيتلموا عليا وهبقى أنا اللي غلطانة ساعتها حتى لو هو اللي غلط”.
وأشارت إلى أنها وجهت شكواها للإنتاج، مضيفة: “اشتكيت للإنتاج بسبب إهانته، والناس خليته جه يعتذر لي وقتها وقالي معلش يا مريومة وحقك عليا، ولكن مش منطقي يهزقني أمام كل العدد ده من الناس في اللوكيشن، ويعتذر لي بيني وبينه”.
مسلسل نسل الأغراب
واختتمت حديثها: “أنا مضيت على المسلسل لتصوير 5 أيام بمبلغ معين، لكن التصوير وصل لـ17 يوم، وطلبت فلوس زيادة ولكن اعترضوا، فاشتكيت لدكتور أشرف زكي، وفي الآخر عوضوني بـ10 آلاف جنيه فقط، وكنت بشتغل العمل ده وبتمنى امتى أخلصه، ووصل معايا الأمر إني كنت بدعي على محمد سامي برموش عيني ليلة القدر، وبعدها مباشرة اتُخذ القرار بإيقاف الشركة المتحدة العمل معه، فمكنتش مصدقة وحمدت ربنا”.
وكانت أعلنت الشركة المتحدة للخدمات الإعلامية، أنه تم اتخاذ قرار بوقف التعامل مع المخرج وكاتب السيناريو محمد سامي عبد العزيز.
وعلم "القاهرة 24" من مصادره، أن المخرج محمد سامي يعد لمسلسل في الموسم الرمضاني المقبل 2022، يجمع فيه عدد من الفنانين وأبرزهم هند صبري، وأحمد السقا، ومحمد رمضان، وحتى الآن هناك موافقات مبدئية معهم.
وشاركت مريم سعيد في مسلسل “نسل الأغراب”، بطولة كلا من أحمد السقا، أمير كرارة، دياب، مي عمر، نجلاء بدر، وغيرهم من الفنانين وهو من تأليف وإخراج محمد سامي
