شادي شامل يشن هجومًا على الشاعر تامر حسين: "ضرب القانون بعرض الحائط.. ويساومني"
شن المطرب شادي شامل، هجومًا على الشاعر تامر حسين، مستنكرًا كيفية قدرته على حذف أغنية “يا معود قلبي" من موقع الفيديوهات الشهير “يوتيوب”، وهو لا يملكها، مشيرًا إلى أنه تعرض من حسين لإهانة له ولأهله ومساومة خلال العامين الماضيين، بالإضافة إلى ضرب حسين القانون المصري بعرض الحائط.
ونشر شادي شامل عبر حسابه الشخصي على موقع التواصل الاجتماعي “فيسبوك”، صورة تنازل تامر حسين عن ملكية الأغنية في المصنفات الفنية، وكواليس تسجيل الأغنية، وعلق قائلًا: “أنا مصدوم واتخدعت خدعة عمري في الشاعر تامر حسين بجد يا خسارة وكنت بعامله أكتر من أخويا وبعامله بالحسنى وطعني في ضهري ازاي في ناس ليهم طريقى في إقناع الناس بعكس الحقيقة”.
وتابع "أنا ساكت بقالي سنتين على إهانة تامر حسين ليا و لأهلي.. تامر شال أغنيتي يا معود قلبي امبارح من اليوتيوب معرفش عمل كده إزااااااي!! بعد ما كانت داخله على نص مليون view في أقل من 24 ساعة.. تامر بيدعي إني ما دتوش فلوس الأغنية مع إنه عاملي تنازل من سنتين على الأغنية في المصنفات الفنية ومختوم بختم الجمهورية وواخد أجره المادي الكامل باعتراف منه ومعترف بذلك في التنازل وقالي بعد ما عمل التنازل الأغنيه ملكك يا شادي أنت تعبت و تستاهل".
وتابع: “وكان بيجيلي الاستوديو ويشهد على ذلك الموزع مهاب سامي وتامر كان في الاستوديو بيوجهني مع إني ملحن الأغنية بس ما حبتش أكسفه..ورفع عليا قضية في المحكمة الاقتصادية بعد سنتين من التنازل ويطلب من المحكمه بإلغاء التنازل والمحكمه ادته حكم بعدم الاختصاص وهذا هو قضاء مصر المحترم و لم يصدر حكم رسمي بعدم نزول الأغنية ووقف الأغنية.. تامر ضرب قانون مصر بعرض الحائط.. تامر بيقول حقوق الملكية معاه.. ياريت الأستاذ تامر يطلعها و نشوفها!.. ليه بقى تامر عمل كده معايا مع إنه عاملي التنازل لسببين.. ١/ رفضي تلات مرات إعطائها لمطرب كبير مع إن المطرب الكبير تفهم موقفي وكان في منتهى الذوق والاحترام والأدب معايا وتربطنا علاقة أخوة وصداقة محترمة وبحبه جدااا وهو عارف كده.. تامر كان عايز يجامله على حسابي وحساب تعبي وشقايا بمعرفة موسيقيين كبار فالوسط الفني.. أنا والله العظيم كل كلمة عندي بالدليل.. ٢/ لما صورت الأغنية وصرفت عليها جامد طلب مني فلوس زيادة وآلاف الدولارات وطلب مني مشاركته في أرباح اليوتيوب و كان هذا الطلب غريب جدا بالنسبة لي مع إني الملحن والمطرب.. ده غير طبعا السب والقذف والافتراء و شتم أهلي وأُمي بأدنى وأفظع الشتايم على موبايلي واتهمني في شرفي لمده سنتين ومردتش عليه بأي لفظ وبالدليل والمسجات عندي كتابية وصوتية".
وأضاف: “وعندي دلائل صوتية وكتابية وورقية.. مش عشان تامر عنده وسايط ومحسوبيات أتأذي أنا في شغلي ومستقلبلي وشقايا.. وفي ناس تعبت في الأغنية زي الموزع مهاب سامي وزي مهندس الصوت الأستاذ محمد صقر والعازفين اللي سافرت بره وسجلت عزفهم والاستاذ إسلام طارق اللي سهر لمده شهر يعمل edit للكليب.. وأنا اللي سافرت كوبا و زينزبار وصرفت دم قلبي على الكليب عشان يطلع بالكواليتي المحترم ده.. السؤال الذي يطرح نفسه اتقفلت ازاي من اليوتيوب ؟ وهو معندهوش حكم قانوني من المحكمة ولا حكم محكمه بإلغاء التنازل.. بيدعي إنه ما اخدش فلوسه بالرغم من إنه واخد حقه وطلب المزيد المبالغ فيه وكان ردي اتقي الله فيا أنا استنفذت ماديًا وكان رد تامر يبقى تديني الأغنيه باللحن بتاعك وهابيعهالك للمطرب الكبير بمبلغ كبير.. ودي كانت المساومة وعندي رسايله الكتابية و الصوتية بذلك عاوز أوصلكم حاجة مهمة".
وتابع "الفكرة مش فكرة فلوس كبيرة تتعرض عليا، الفكرة إني أبيع فني وشقايا لان الأغنية دي بالذات بمثابة جنين أنا كبرته وتعبت فيه.. هو عمال بيشهر بيا في كل مكان.. أنا مش برد عليه عشان أنا أبويا وأمي ربوني مع إنه شتم أهلي ومردتش.. وكل الناس كانت بتقوله ما تخسرش شادي شامل.. أنا مش أحسن مطرب ولا أجمد مطرب أنا عايز أحقق طموحي وحلمي وهو دمر حلمي.. بس صدقني إن ربك لبالمرصاد.. أنا عارف بعد البوست ده الناس اللي تبع تامر هتشتم فيا متوقع كل حاجة.. بس أنا لازم أاوضح الحقيقة للناس.. أنا هاخد حقي بالقانون وأنا واثق في قضاء مصر المحترم زي ما جبلي حقي أول مرة.. هيجبلي حقي تاني إنه عمل إجراء غير قانوني بمنع أغنيتي من اليوتيوب".
واختتم شادي شامل حديثه قائلًا: "اقسم بالله العظيم إن هذا الشخص أفقدني الثقة في الناس لأني كنت شايف صورة غير الصورة واتخدعت.. معقول في ناس تستحل الظلم وتستحل عرق الناس بالباطل.. نصيحة أخ اوعوا تنخدعوا بالمظاهر والكلام المتذوق المترتب عشان أنا أول واحد اتخدعت بنفس الطريقة.. الله يسامحك يا أخي والله هختصمك يوم القيامة.. والدي والدتي بيدعوا عليك كل يوم.. حسبي الله و نعم الوكيل.. حسبي الله و نعم الوكيل.. حسبي الله و نعمه الوكيل.. اللي يدعمني وعاوز يقف ضد هذا الظلم البين يشير البوست ده وشكرا.. ادعم هذا الهشتاج و كل شاب كان عايز يثبت نفسه في أغنيه يا معود قلبي"، وفعل هاشتاج: “رجعوا أغنية شادي شامل يا معود قلبي”.
