تعرف على أبرز شهادات لفتيات اتهمن ممثلًا شهيرًا بالتحرش
ما زالت أزمة تعرض فتيات للتحرش على يد فنان ومدرب تمثيل شهير يدعي ش.خ، متصدرة مواقع التواصل الاجتماعي بعد تلقي المجلس القومي المرأة بلاغات من عشرات الفتيات سردن خلال شكواهن تفاصيل مثيرة حول تعرضهن للتحرش خلال حضورهن دورات وورش تمثيل في أحد الاستوديوهات التي كان يديرها.
وقررت بعض ضحايا التحرش من الفنان الشهير ش.خ لسرد تجاربهن تحت هاشتاج كله هايتعرف، مطالبين بحقوقهن ومحاكمة الجاني، ويستعرض “القاهرة 24” في السطور التالية 10 شهادات من فتيات عن تعرضهن للتحرش من الممثل ش.خ:
كتبت إحدى الفتيات في شكواها: "أنا تعرضت لحوادث تحرش كتير قبل كده بس دي كانت أول مرة تكون من شخص قريب مني وشخص كنت بثق فيه، وللأسف لحد دلوقتي بسمع عن بنات تانية الشخص ده استغلهم برضه، أنا كنت باخد ورشة تمثيل مع الممثل، في 2018، كان دايمًا حريص إنه يخلي المكان مريح لينا علشان نعرف نعبر عن نفسنا ونحكي حاجات شخصية بس للأسف كان بيستخدم ده لمصلحته علشان يتحرش بالبنات".
وأضافت: "في يوم بعد الورشة قال لي أنا واتنين ولاد صحابي نخرج سوا وروحنا نقعد في مكان وفي نص الكلام بدأ يتكلم عن تجاربه الجنسية ومرة واحدة حط إيده على ضهري من تحت خالص وقربني منه وفضل لامسني لحد ما شال إيده لما جينا نمشي، أنا من الخضة ما بينتش حاجة وعلشان كده الولدين ماخدوش بالهم".
وتابعت: "وأنا من وقتها اتخضيت وما عرفتش أعمل إيه وفضلت ساكتة لأني عمري ما سمحت له يقرب مني بالشكل ده خالص، وبعد فترة طويلة بدأت أسمع عن قصص مختلفة من بنات كتير هو اتحرش بيهم ولحد دلوقتي بشوف بنات بتروح الاستوديو وتاخد ورش معاه ويكون عايزة أحذرهم علشان يكونوا عارفين الشخص ده نيته إيه".
فيما كشفت فتاة أخرى تفاصيل صادمة عن تعرضها للتحرش إذ كتبت: "بالنسبة لي كان صديق وأخ كبير مش مدرب كان الناس القريبين من الطلبة بتوعه بنروح نسهر عنده في مكان كدا في البيت بتاعه فيه شاشة كبيرة بنشوف عليها أفلام ونحللها فنيًا، وفي يوم قدم لنا مشروب بس هو ما شربش، واتأخرنا في اليوم ده عنده وكنت متعمدة إن زمايلي هيوصلوني وفي آخر الليلة عرضوا بالفعل يوصلوني فهو رفض أكتر من مرة وضغط عليا إن هو اللي يوصلني فقلت تمام ولميت حاجتي علشان امشي في نفس الوقت لقيتهم مشيوا وهو قعد طلبت منه نمشي قال لي هشرب سيجارة الأول فضلت مستنية وكنت تعبانة جدًا من اللي شربناه فيادوب قادرة أقف".
وتابعت: “كنت حاسة على خفيف كدا بس جسمي مش قادر يستجيب قوي من التعب، فجأة دون مقدمات أخد مساحة عمري في حياتي ما سمحت له بيها ولا دي طبيعة علاقتنا قرب مني ودخل إيده جوه هدومي ولزق فيا بشكل مرعب وحشر ركبته بين رجليا بشكل مؤلم، ساعتها فقت كأني لسه مضروبة على وشي وزقيته ماعرفش إزاي بص لي بصة مرعبة كدت، قرب تاني وحضني فبعدته وقلت له لو سمحت روحني قفش ومشاني”.
وأكملت: "تاني يوم بعت لي يحاول بكل الطرق يجس النبض علشان يشوف أنا فاكرة اللي حصل ولا لأ بس أنا خفت أواجهه علشان هو يقدر يلعب بمشاعري وشوشلي الحاجات اللي أنا فاكراها فقررت أسكت واحتفظ بيها، بس أنا دلوقتي شايفة فيه ورش كتير بتتعمل والبنات بتروحها وبتتأذي منه فأنا حاسة بالذنب ونفسي أخلي ماحدش يروح عنده، أنا فعلًا خايفة على كل بنت بتروح له ومش عارفة اعمل إيه".
وأوضحت فتاة أخرى طريقة استغلال الممثل الشهير الفتيات للتحرش بهن، إذ كتبت: "كنت باخد ورش تمثيل مع الممثل كان دايمًا حريص إنه يخلي المكان مريح لينا علشان نعرف نعبر عن نفسنا ونحكي حاجات شخصية بس للأسف كان بيستخدم ده لمصلحته علشان يتحرش بالبنات".
كما كتبت فتاة أخرى: “أنا حصل لي نفس الموقف اللي كل البنات اتعرضت له، والمفاجأة إنها طلعت نفس الطريقة حصلت لكذا بنت بحجة تمارين تخص الورشة اللي كنا فيها، ولما أنا حصل معايا حاجات غريبة في التمرين اعترضت”.
وأضافت الفتاة: “وبعدت وكان رده إنتي جبانة ولازم تشيلي الخوف من عليكي علشان تقدري تطلعي اللي جواكي وتستفيدي لشغل الورشة وكلام من ده، بعدها أنا سكت وما كنتش عارفة أفكر ومشيت من هناك وما روحتش تاني”.
وأوضخت فتاة أخرى استغلالها من الممثل الشهير خلال التدريب ما جعلها تظن أن مشهد حقيقيًا: “خلي حد يكلمني علشان يقولي لي إنه عندي تدريب لوحدي لمشروع التخرج وفعلًا روحت كان عندي 19 سنة وقتها وهو بيدربني زقني في الحيطة واتحرش بيا وكان قافل بالمفتاح وكنت فاكرة إنه عامل كده علشان محدش يقطع المشهد”.
