حلا شيحة ليست الأولى.. فنانون واجهوا تامر حسني في "ساحة عتاب السوشيال" (صور)
تحولت مواقع التواصل الاجتماعي لساحة من العتاب للفنان تامر حسني، من قبل مجموعة من الفنانين زملائه، فلم تكن واقعة الفنانة حلا شيحة هي حالة العتاب الأولى من نوعها لتامر حسني، حيث سبقها الفنان أحمد السقا، والفنانة المغربية بسمة بوسيل.
وكانت الفنانة حلا شيحا عاتبت الفنان تامر حسني على كليب “بحبك” الذي طرحه منذ يومين يجمعه بها، وكتبت حلا عبر منشور على “انستجرام”: “أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة، أيام مباركة وخصوصًا بعد آخر بوست نزلته ووضحت فيه أنا إيه”.
أحمد السقا
تحدث الفنان أحمد السقا، عن موقف أزعجه من صديقه تامر حسني خلال استضافته ببرنامج “السيرة” الذي تقدمه الإعلامية وفاء الكيلاني، وقال: "أنا زعلان من تامر حسني، أنا بحب تامر جدا ولو مش بحبه مش هزعل منه، “بعد ما عملت لتامر حسني مشهد ضيف شرف في فيلم الفلوس فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قولتله إيه اللي بيحصل ده يا تامر، مرة قالي دول فانز، ومرة قال دول الشركة المنتجة، قولتله أنا معرفش حد منهم أنا معرفش غيرك، ودي أثرت عليا جدا نفسيا وعليا في شغلي”.
وأضاف السقا: "هو كلمني في فيلم الفلوس، وقالي إنه عايزني أعمل معاه مشهد، فردت المجاملة بتاعة ولاد الغلابة، فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قلتله إيه اللي بيحصل ده، مرة قالي دول فانز، ومرة قال دول الشركة المنتجة، وده أثر عليا جدا".
ورد تامر حسني، على السقا من خلال “ستوري” عبر حسابه الشخصي على “انستجرام”، قائلًا: "حبيبي وأخويا وصديق العمر ونجم الدنيا كلها أحمد السقا، كنت أتمنى انك تكلمني بيني وبينك، ولو كنت زعلان من أي حاجة أو فاهم أي حاجة غلط، لأن الحجات دي لا يمكن تفوتك، وأنا كنت أتمنى مكتبش الكلام دا هنا، بس عشان بعد كلامك في التلفزيون، الجمهور الكريم بقى ليه حق إنه يفهم الصح”.
وأضاف: “عشان أفكرك بس، أنت كلمتني وقلت لي فيه خبر في موقع، وعليه صورة افتراضية للفيلم، وكاتبين أنك بطل في الفيلم، وأنا رديت عليك ان دي اجتهادات صحفية والصورة من تصميم محبين اللي اكيد فرحوا بالخبر اننا مع بعض”.
وتابع: “حتى أنا مقولتش ان دي الشركة المنتجة، لأنها شركة كبيرة، ولا يمكن تعمل كدا، لأن الفيلم متباع للخارج والداخل باسم أخوك تامر حسني، نزل والناس كلها شافته، وأنت مش فيه ولا فيه اسمك، كل الأبطال طالعين مرسومين، ومعرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة”.
واختتم تامر حسني حديثه قائلًا: “أنا شرحتلك دا من سنة واتكلمنا بعدها، مرة عيدت عليك في عيد ميلادك والتانية بخصوص برنامجك، ولو كنت لسه زعلان كنت هتقولي ساعتها، الفيلم بقاله سنة يا أحمد.. أنت حبيبي يا أحمد وصديق عمر، عشان كدا أنا اللي مش هزعل منك، معلش طولت في الكلام، لأن برضوا زعلك يعز عليا”.
وأوضح السقا أن ذلك الموقف ما هو إلا سوء تفاهم، وكتب عبر حسابه الشخصي على موقع التواصل الاجتماعي “فيسبوك”: "رسالة إلى صديق عزيز.. صديقى وأخى العزيز تامر حسنى.. أنت عارف اللى بينى وبينك عيش وملح وحاجات كتير، قد أكون أخطأت إنى اتكلمت في الموضوع ع الهوا ولكن يعلم الله كم كنت مجروحا وكم كنت حزينا.. مش هطول عليك أكتر من كده ولو أنا زعلت شوية وأنت شوية نبقى خالصين يا عم.. تامر حسنى إحنا اللى بينا كتير متزعلش يا عم وحقك عليّ.. وميعادنا الحفلة اللى جاية.. أحمد السقا”.
بسمة بوسيل
أعلنت الفنانة المغربية بسمة بوسيل انفصالها عن تامر حسني، من خلال “ستوري” عبر “انستجرام”، وكتبت: "لكل الناس اللي بتبعتلي صور وفيديوهات لتامر وشايفة إنه مش بيعملي احترام سواء في صور أو فيديوهات، يا ريت تبطلوا تبعتولي أي حاجة عشان مش فارقلي أي صور.. أحب أعرفكوا إن إحنا بقالنا فترة منفصلين وبنحضر أوراق الطلاق، يا ريت تحترموا مشاعر كل واحد فينا وبطلوا على الأقل تبعتولي أي حاجة.. بالتوفيق".
ورد تامر حسني على بسمة عبر “ستوري” على “انستجرام”، قائلًا: "بسمة حبيبتي، للأسف أنتى مفكرتيش كويس، وسلمتي ودنك لشر السوشيال ميديا، عشان كام تعليق كلامهم فارغ، نسوكي إنك عرفتيني وأنا مشهور، وطبيعة شغلي اللي عرفتيني وحبتيني بيها، ازاى وصلوكي للزعل والبعد فترة، المهم إني مش هزعل منك، ولا يرضيني زعلك، أنتى حبيبتي، وهما ولادي، أنا ضهرك وسندك مهما حصل، بس اللي عايز أقوله، لعله يكون سبب خير في توعية ناس كتير، ليه لما أي حد يزعل من حد؛ بيطلع يكتب عليه في السوشيال ميديا، طب حتى يكلمه في الأول، إيه علاقة الناس بمشكلة شخصية بين اتنين ممكن تتحل بالتليفون، أو في زيارة رحيمة ما بينهم، وياريتها مشكلة أصلا، ربنا جعل ما بينا مودة ورحمة علشان كدا، عشان للاسف انتي عارفة إن في ناس حب خراب البيوت طبيعتهم، ومش هنخلص منهم، بس إنتي اللي هتخلصي من فكرة إنك تسمعيهم، مع إنك ماكنتيش كده”.
وأضاف: “ياريتك تركزي مع طاقة الناس اللي دعولنا ودعوا لاولانا بكل خير، وفعلا أنا بشكر كل الناس، وبشكر كل الفنانين اللي سعوا في الخير لينا، وأنا واثق دلوقتي إنك زعلانه أنك كتبتي كده، هو تصرف متهور منك، بس ولا يهمك، مش عيب إن الأنسان يغلط ويتعلم، وأنا ياما علمتك، ولسه هعلمك، كان نفسي الكلام دا يكون بينا، لكن أنتي أشركتي الجمهور الكريم؛ فكان لازم أرد هنا، بينا حب غالي، وحياة كريمة، وأولادنا وبيتنا أغلى ما فيها، ربنا يخلينا ويخليهم لينا يارب، متهورة بس بحبك”.
حلا شيحة
وعاتبت حلا الفنان تامر حسني على كليب “بحبك” الذي طرحه منذ يومين يجمعه بها، وكتبت حلا عبر منشور على “انستجرام”: "أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة، أيام مباركة وخصوصًا بعد آخر بوست نزلته ووضحت فيه أنا إيه، واتفاجئت أكتر خصوصًا بعد وعد تامر حسني ليا وتأكيده إنه هيحترم رغبتي، وبعض الطلبات اللي طلبتها منه بكل احترام وود الصيف اللي فات، وأكدلي إنه هيحترم رغبتي”.
وأضافت: “إحنا يمكن نجحنا بمقايس الدنيا بس صدقوني بمقايس ربنا إحنا لم ولن ننجح، أنا عارفة ومتأكدة إن زملائي جواهم خير، بس للأسف فتنة الشهرة والنجاح مش بتخلينا نشوف ونقيس الأمور صح، بتكلم من قلبي، الكليب ده ميرضيش ربنا، وأنا عيطت لإني شفت نفسي في المشاهد دي، دي كانت زلة نتيجة ظروف مريت بيها وكلنا بنغلط ولازم نغلط، علشان إحنا بشر بس المصيبة إننا بنغفل وبننسى”.
وتابعت حلا شيحة: “أنا مش هتكسف من حد أنا تبت من المشاهد دي وهي لا تصح، وأنا غلطت وبصلح وأهم حاجة إن ربنا يرضى عني لإن في الآخر ده اللي هينفعنا، مش الشهرة ولا النجاح، لا هو مش نجاح أصلا،علشان النجاح الحقيقي حاجة تانية خالص، إحنا أغلبنا ناسينها إلا القليلين منا”.
ورد تامر حسني على موقف حلا شيحة، من خلال منشور على “انستجرام”، وكتب: “نهاركم جميل يا أغلى الناس الحقيقهةعمري ما بتخيل إني أدخل في نقاش بالشكل دا مع زميل بحترمه وكان في بينا كل خير.. للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصيًا ونتناقش بيني وبينك، فا أنا مضطر أرد هنا برضو”.
وتابع: “أولًا أنا عمري ما وعدتك إن الكليب مش هينزل دا محصلش أصلًا يا حلا مش أنا خالص اللي أوعد وأخلف.. الحقيقة اني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة وبعدين الفيلم بقاله 3 أسابيع في السينمات والكليب موجود جوه الفيلم هو بالنسبالك الحرام إننا ننزل الكليب على اليوتيوب بس!! إنما الكليب يتشاف جوه السينمات عادي ؟؟”.
وأضاف: “منطق غريب فعلًا يا حلا، وبعدين هو مش انتي اللي مضيتي عقد وتقاضيتي عليه مبلغ كبير عشان الدور دا بعينه!! هو مش انتي اللي صورتيه ومثلتيه بنفسك وبمنتهى الرضا ولاّ حد أجبرك ؟! وللتوضيح للجمهور الكريم أنا والمخرجة الأستاذة سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا وتليفوناتك كلها كانت بتقفل في وشنا.. انتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما انتي فجأه اختفيتي ومكملتيش تركيب صوتك في الفيلم ولا جيتي تتصوري عشان أفيش الفيلم أصلًا ومخليتيناش نعرف نعمل أفيش مجمع!".
واختتم حديثه قائلًا: "وبقيتي تقفلي تليفوناتك وتكنسلي علينا كلنا وبعدين أي فيلم بيبقى ليه خطة مسبقة في الدعاية وانتي عارفاها كويس ووافقتي عليها ودا كليب رومانسي يعني معقول كنتي عايزة المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلًا هو دا يُعقل؟! أنا زعلان منك جدًا يا حلا على مفردات البوست بتاعك الغير موفقة ومستحيل هرد بطريقتك اللي فيها تجريح واتهامات باطلة ليا احترامًا لحجات كتير يمكن فايتاكي بس مش هتفوتني وعلى فكرة أنا واثق إنك عارفة إني مستاهلش منك كدا وهكتفي بالتوضيح دا وربنا يهدي الجميع ويكتبلك كل الخير اللهم آمين”.
