حلا شيحة تكذب والدها: "مصدومة من الكلام.. ولن أسمح لأحد بالحديث عن زوجي"
أعربت الفنانة حلا شيحة، عن استيائها الشديد من تصريحات والدها أحمد شيحة، على زوجها الداعية معز مسعود، والذي أكد أنه يشك في أن يكون تصريحها الأخير حول بعض مشاهدها في فيلم "مش أنا" بدافع زواجها وليس منها.
وكتبت حلا شيحة، منشورًا عبر حسابه الشخصي بموقع تبادل الصور والفيديوهات “انستجرام"، وقالت: “الحقيقة مصدومة من الكلام اللي والدي قاله عن زوجي اللي اتجوزته بكامل إرادتي، والحمد لله لقيت معه كل المعاني الجميلة من احترام ورجولة وشهامة نادرة الأيام دي.. وأنا لم يخطفني أحد، كما قال والدي والكلام ده لا يصح أبدًا”.
وتابعت: “أنا بحب زوجي وسعيدة بحبه ليا وبنحترم بعض، ومعز بيحترم رأيي وبيقدر مشاعري وبالعكس هو دائما بيهدّيني.. وطبعا بيساندني ويشجعني لأني زوجته وحبيبته، وهو أكبر بكتير من كل الكلام اللي بيتقال عليه، وافتراءات مش صحيحة هو أبعد ما يكون عنها”.
وأضافت: "لن اسمح لأحد الكلام عنه ولن أسمح بأي تصور خاطئ عنه، بأي شكل من الاشكال معز طول عمره له رؤيته الواضحة في الدين وحتي في الفن، وهو ليس مع أي جماعة أو فئة معينة هو يمثل نفسه وله أفكاره وأراؤه العلمية والدينية المختلفة الجميلة، وليس لأحد أن يصنفه أو يضعه في أي قالب فقط لأن هواه لا يوافق ما يمثله معز".
وأردفت: "هو في إيه في بلدنا الأيام دي، بنحارب ونصارع في بعض وعايشين في قصص وهمية من نسج خيالنا عن بعض.. هو خلاص أي حد يتكلم بلغة الدين لازم يبقي متطرف أو إخواني، هو مبقاش في مسلمين وسطيين طبيعيين، هو ليه كل أنواع الهجوم ده علي أي حد.. أنا زعلانة من والدي جدًا لأنه يعرف معز كويس جدا، وقعدوا مع بعض كتير ووالدي يحبه جدا وشاف منه كل خير".
وأوضحت: "معز زيي اتجوز 14 سنة من عمره، وكان مستقر في حياته وعنده ثلاث أولاد ربنا يخليهم له، جمال ما شاء الله وعمره ما كان بتاع ستات زي ما بيتقال كلام لا يليق أبدا وفي الآخر زيي لم يكمل جوازه وحدث الطلاق وكلنا معرضين لده طبيعي، إنه كان بيحاول زي أي راجل محترم أنه يلاقي استقرار في حياته في الحلال ومتوفقش أكتر من مرة".
واختتمت: "ودي مش حاجة تعيب أي حد.. والحمد لله اتقابلنا وتلاقينا لأن ظروفنا قريبة جدا وعندي أولاد مثله وأولادنا شبه بعض الحمد لله واستقرينا إحنا الاتنين.. ليه ده يزعل الناس بدل ما ندعي لبعض بالخير بقينا نتصيد لبعض.. ونخوض في أعراض بعض هو حصل في مجتمعنا ده احنا جرالنا ايه".
