مش عايز تباتة وهتدفع عافية.. القبض على سايس بـ تهمة البلطجة وإهانة صاحب سيارة في الدقي
ألقت الأجهزة الأمنية بالجيزة القبض على سايس في منطقة الدقي، متهم بالبلطجة والتعدي على صاحب سيارة، بسبب “ركنة سيارة”، حيث طالب السايس المواطن بدفع 10 جنيهات دون وجه حق بحجة وجوده في المنطقة منذ فترة، ويحق له تحصيل مبالغ مالية مقابل ركن السيارات.
كان مستخدمو مواقع التواصل الاجتماعي فيس بوك، تداولوا واقعة لسايس في منطقة الدقي يتعدى على شخص بسبب ركنة سيارة للحصول على مبالغ مالية.
أحد الأشخاص يدعى هشام. ا، ذكر على صفحته الشخصية بموقع التواصل الاجتماعي فيس بوك، متضررا من السايس، أنه خلال وجوده بمنطقة المهندسين حاول ركن سياراته في أحد الطرقات الجانبية، أتى إليه شاب يدّعي أنه سايس ومسئول عن المنطقة وطلب منه 10 جنيهات ثمن ركن سياراته.
أضاف هشام في منشوره: أنا أصلا قافل الإزاز وفاتح التكييف ومش مركز معاه باصص فى المرايا وبركن عادي، المهم دخلت اتفرجت ومفيش حاجة عجبتني مطولتش في الفرع وخرجت رايح أركب العربية لقيت المساحة اليمين مرفوعة مش عشان كان بيمسح الإزاز، لا دي علامة إن العربية دي مدفعتش مسبقا يعنى".
وتابع في منشوره: أول ما فتحت الباب لقيته جنب الشباك وبيفتح المرايا اللي هو قفلها وبيقولى عشرة جنيه يا باشا بثقة غريبة، متابعا: أنا عامة مش بحب الناس دي ولا بحب أسلوب إني أدفع لحد فلوس مش فاهم أنا بدفعها ليه، خصوصا إن مفيش أي مبرر لدفع الفلوس دي بس ممكن بالحب تاخد عينيه والله، كما ذكر في منشوره.
واستكمل: بصتله باستغراب اللى هو نعم يعنى وقولتله عشرة جنيه بتاعت أيه.. رد السايس عشرة جنيه وعشرين جنيه هو هنا كدة يا باشا.
رددت عليه: هو أنا راكن عندك فى البيت ولا إيه.. رد آه يا باشا المكان ده بتاعى ونده على واحد يا رجب أنا هنا بقالى قد إيه قاله أزيد من عشر سنين.. طيب لو مدفعتش العشرة جنيه إيه اللي هيحصل رد السايس أنا هاخد منك خمسة جنيه بس مش هاخد عشرة".
وذكر ناشر البوست: لا أنا لو مدفعتش خالص ولا خمسة ولا عشرة إيه اللى هيحصل.. رد: بقولك أيه أنا مش عايز تباتة أنا هاخد خمسة جنيه يعنى هاخد خمسة جنيه حقى.. وبيعلي صوته ولو عايز نروح القسم سوا يلا وأنا وأنت نبات هناك.. متعليش صوتك.. والله العظيم ما أنت واخد حاجة وأنا هجبلك القسم هنا.. والله العظيم لاخد ومش هتمشى ولا هتتحرك بالعربية غير لما أخد حقى ووريني القسم والنيابة هيعملولك أيه.
وأضاف: رفعت قزاز العربية وفتحت التكييف وافتكرت أني شوفت كذا خبر قبل كده عن موضوع السايس ده والشرطة عاملة رقم تتصل بيه لو السايس عايز ياخد منك فلوس بالعافية اتصلت بالنجدة 122.. السايس قالي واقف جمب الشباك بيقولى لما ييجوا هقولهم إن أنا اديتك خمسة وأربعين جنيه باقى خمسين وماخدتش منك الخمسين جنيه يا نصاب أنا عايز الخمسة وأربعين جنيه بتوعى يا نصاب.
وأكد أنه بعد 15 دقيقة تواصلت معه قوات الشرطة بصيت لقيت ميكروباص وشايف فيه واحد لابس ميري روحت له ولقيت الواد جاي ورايا بثقة غريبة، وأمين الشرطة نزل من الباب اللي قدام فتح الباب الجرار وراح ماسك الواد حدفه فى العربية.. خدت نفس طويل بابتسامة جميلة وقولت له شكرا".
وتابع: "حقيقى أنا مبسوط جدا من استجابة الشرطة السريعة وحابب أشكرهم على تأدية عملهم.. ومبسوط إن واحد بلطجي بياخد فلوس دون أي وجه حق من الناس هيروح لمكانه الطبيعى.. أو على الأقل هيخاف يعمل كده تاني دي الأرقام اللي المفروض تتصل بيها لما تتعرض لأى موقف زي ده وياريت محدش يسكت لمجرد الخوف أو كلمة.
جدير بالذكر أن محافظة الجيزة فعلت مؤخرا قانون السايس الجديد الخاص بتنظيم انتظار المركبات في الشوارع التابعة لولاية المحافظات وأجهزة المدن المختلفة الخاضعة لإدارة هيئة المجتمعات العمرانية الجديدة.
وحددت محافظة الجيزة لائحة تحصيل رسوم خاصة بتنظيم انتظار السيارات في الشوارع وأسفل العقارات قدرها 10 جنيهات للانتظار المؤقت للسيارة الملاكي، و20 جنيها للانتظار المؤقت للسيارة نصف النقل، و30 جنيها للانتظار المؤقت للحافلات الكبيرة، و300 جنيه شهريًا للمبيت أسفل العقار.
