بسبب خطأ في بطاقة الخدمات ومعاملة الموظفين السيئة له.. مواطن يستغيث بالسيسي ووزيرة التضامن
استغاث إسلام وهبان رئيس القسم الثقافي بموقع إعلام دوت كوم ومؤسس مكتبة وهبان، بالرئيس عبدالفتاح السيسي، رئيس الجمهورية، والدكتورة نيفين القباج، وزيرة التضامن الاجتماعي، وذلك بعد استخراجه بطاقة الخدمات المتكاملة الخاصة بذوي الإعاقة، والتي حملت بيانات خاطئة عن إعاقته.
وقال إسلام وهبان، في منشور له على صفحته على موقع التواصل الاجتماعي، إنه أقبل على استخراج بطاقة الخدمات الكاملة بعد احتياجه الحصول على سيارة معفاة من الجمارك، وهي حق أصيل لذوي الإعاقة توفره الدولة، مردفًا: عمري ما تصدرت المشهد بإني من ذوي الاحتياجات الخاصة أو إني ناقصني شيء، بل وبرفض ده نهائيًا.. لكن للأسف الشديد أنا مضطر أكتب البوست ده، لإني فعلًا مستاء وحزين من تعامل موظفي وزارة التضامن الاجتماعي مع حق من حقوقي الأصيلة، ومن الدوخة اللي دايخها بقالي أكتر من 6 شهور.
وتابع: السيارة عشان أقدر أحصل عليها في إجراءات وأوراق لازم أقدمها، وده عشان يصدر ليا بطاقة الخدمات المتكاملة اللي من خلالها أقدر أقدم وأحصل على السيارة، وبعد فترة طويلة من الانتظار.. صدر كارت الخدمات المتكاملة، لكن ببيانات غلط ومكتوب إعاقة غير إعاقتي، وكمان اتبعتلي كارتين بدل كارت واحد في سابقة غريبة من نوعها، ولما تواصلت مع الوزارة، قالولى استخدم اللي مكتوب فيها البيانات الصح واعتبر الثانية مجاتلكش، رغم أن هم الاتنين مربوطين بنفس الرقم القومي.
وأضاف: فوجئت أن بطاقة الخدمات المتكاملة اللي فيها البيانات الخطأ هي اللي مسجلة على موقع المجالس الطبية، اللي بحجز منه ميعاد للقومسيون الطبي، وبالتالي أنا كدة هطلب الحصول على سيارة ببيانات غلط وبإعاقة غير إعاقتي، ولأكثر من شهرين وأنا في محاولات لتعديل البيانات أو إصدار بطاقة خدمات متكاملة جديدة لكن دون جدوى، فقط بهدلة في المصالح الحكومية، وكل موظف يقول كلمة شكل.. شهرين أغلب شغلي بيقف عشان مش معايا عربية من حقي الحصول عليها، شهرين من التشتيت وعدم الفهم والمعاملة السيئة من موظفين مش عارفين أصلا هم بيقدموا إيه ولا اللي قدامهم ممكن يكون متعطل ازاي.
وأختتم منشوره: أبويا وأمي اللي الرئيس عبد الفتاح السيسي كرمها كأم مثالية على مستوى الجمهورية، ربوني إني ما أطلبش شيء من حد، وأنا عمري ما طلبت، لكن علموني كويس أوي إني أتمسك بحقي لإن كلمة الحق دايما أقوى.. وأنا بطالب رئاسة الجمهورية ووزارة التضامن الاجتماعي تجيبلي حقي اللي وفرتهولى الدولة، واللي أنا مؤمن بإنها بتبذل مجهود جبار لتحقيقه، فما ينفعش كل ده يضيع ونعاني وشغلي يقف عشان موظف مش فاهم.
