مُسنة بالدقهلية تعاني من مرض نادر بالأوردة: محتاجه لعلاج بـ 90 ألف جنيه
تعاني سيدة مسنة بقرية كفر طناح التابعة لمركز المنصورة في محافظة الدقهلية، من مرض نادر بالأوردة تسبب في فقدانها الحركة.
وقالت السيدة المدعوة، أم أحمد، 61 سنة، ومقيمة بقرية كفر طناح التابعة لمركز المنصورة في محافظة الدقهلية لـ القاهرة 24: أنا مريضة سكر من 6 سنوات، ومن سنتين كنت باعاني من جرح بسيط في رجلي وذهبت لدكتور وعملت عملية تجميل ولكن كان الموضوع ليس له علاقة بالتجميل، ورجلي كانت بتوجعني أكتر لحد ما فقدت الحركة والدكاترة قالوا: أنت بتعاني من مرض نادر بالأوردة.
وأضافت: وبعد ذلك ذهبت لمستشفى الجامعة بالمنصورة، وأجريت إشاعات وتحاليل كانت إحداها بتكلفة 2000 جنيه وبعد ذلك الدكاترة كتبوا 5 حقن الحقنة الواحدة بـ 8 آلاف جنيه، وأنا زوجي متوفى وأولادي مش مقتدرين ماديا، لما اشتكيت الدكتور قالي: حاضر لما ييجي دورك هنكلمك، وقعدت سنة ماردوش عليّ، ولما شخص من بلدنا اقترح إن آخد ورقي وأروح المستشفى الدولي، بالفعل ابني راح المستشفى ولكن كان الرد إن جميع الأوراق اتحرقت.
وتابعت: أنا مش في مقدرتي أعمل التحليل والإشاعات مرة أخرى، باخد علاج ومسكنات لأن علاجي هيتكلف فوق الـ 90 ألف جنيه لو هتعالج على نفقتي الخاصة، وحاليا مش باقدر أتحرك نهائي.
واختتمت السيدة قائلة: أنا باطلب من المسؤولين والأطباء المساعدة، أنا زوجي متوفى وماعنديش أي مصدر رزق ونفسي أتحرك عشان أخدم نفسي.
