هند الراوي بعد مشاركتها في حفل افتتاح طريق الكباش: روحي وأصلي رجعولي
تحدثت المطربة هند الراوي، عن مشاركتها في حفل افتتاح طريق الكباش بمدينة الأقصر، أثناء غنائها ومحاكاة تمثيل عيد الأوبت، امتدادًا من معبد الكرنك إلى معبد الأقصر، بحضور الرئيس عبد الفتاح السيسي، وحرمه.
وأعربت هند الراوي، عن سعادتها وفخرها بالمشاركة في هذا الحدث العالمي، خلال مداخلة هاتفية في برنامج يحدث في مصر، مع الإعلامي شريف عامر، قائلة: أنا عايشة في فرنسا، بس لما باجي مصر وأشترك في أحداث زي دي، بحس روحي وأصولي بترجعلي، أنا والدتي من سوهاج، ووالدي بدوي، بس الصعايدة دول حبايبي.
وعن تحضيراتها للحفل قالت: أنا بقالي 40 يوم بتدرب على الأغنية، وبدأت البروفة النهاردة من الساعه 5 صباحًا، وغنائي لأغنية صعيدية يختلف عن أي غناء تاني، لأنه بيحسسني بالقوة والفخر والشموخ، لما بغني صعيدي بحس أني جاية من الزمن البعيد.
وأضافت الراوي: أنا عايشة برة مصر وبشوف اللي بيحصل في مثل الأحداث دي، لأن العالم كله بيبحث عن الحضارة المصرية، فبشوف أي حدث بيحصل في مصر العالم كله بينتبه له، وهما كمان بيحسوا بالفخر، وبيكونوا مبسوطين.
وتحدثت عن دور المرأة في الحفل قائلة: حسيت النهاردة أن المرأة ليها حقوق في كل شيء، وكنت فرحانة أني أنا ست وواقفة وبغني، وبقول أنا أهو، وكمان وجود ستات كتير في الحدث دا شيء فرحني.
