إيمان الحصري: لما الدكتور قالي تقدري ترجعي بلدك كنت خايفة من المجهول
تحدثت الإعلامية إيمان الحصري، عن فترة علاجها في ألمانيا خلال الـ7 أشهر الماضيين، حيث كشفت عن مشاعرها وقت معرفتها بخبر شفائها.
وقال الحصري، خلال حديثها مع الفنانة إسعاد يونس، في برنامجها صاحبة السعادة المذاع عبر شاشة قناة DMC: في آخر زيارة لما الدكتور قالي خلاص تقدري ترجعي بلدك كنت فرحانة إني هرجع بس في نفس الوقت كنت خايفة من المجهول، خصوصا لما بتتعبي وبتروحي مكان بعيد ببقى بفكر هل ده ممكن يرجع تاني ولا لأ؟، بس قلت خلاص الحياة لازم ترجع بشكل طبيعي، وفي بعض المحاذير اللي ببقى ماشية عليها عشان ده مش بيروح مرة واحدة، وبياخد وقت والحمد لله الدنيا تمام كل المخاوف بتروح مع الوقت.
وروت الحصري، خلال الحلقة العديد من المواقف لأخواتها أثناء فترة علاجها قائلة: كان معايا طول الوقت أخواتي، وبنتي عاليا، وسابوا حياتهم وشغلهم وكانوا قاعدين تحت رجلي.
وواصلت الحصري: وقت ما كنت في العناية المركزة كانوا بيباتوا في العربيات في الشارع، وكنت شايله هم زيادة فوق همي، عشان زعلانة لأنهم سابوا حياتهم عشاني، وكنت خايفه إني أموت وأسيبهم، كنت عبء كبير عليهم.
واختتمت الإعلامية إيمان الحصري: أخواتي كانوا بيسمعوا إني مش هكمل، وعرفت بعد كده أنهم بيمهدوا لبنتي إني مش هكمل وبيقولوا لها إني بتعذب، وأنا كنت في دنيا تانية ساعات فايقة وأوقات لأ.
