سمير صبري يكشف عن كواليس أغنية محتار أنا ويا البنات: اتكتب على ورقة بفرة
تحدث الفنان سمير صبري، عن كواليس أغنية محتار أنا ويا البنات، التي عرضت في فيلم حب وكبرياء عام 1972، وكان بطولته وبطولة الفنانة نجلاء فتحي، والفنان محمود ياسين، وحسين فهمي، ومديحة كامل، وعماد حمدي، وعدد كبير من الفنانين.
وقال صبري، خلال حواره مع الإعلامية لميس الحديدي، في برنامج كلمة أخيرة: كنا بنصور حب وكبريا ء في الإسكندرية، وقريب نجلاء فتحي بطلة الفليم مات، وكانت قاعدة في أوضتها حزينة بتعيط، كنا كلنا في أوتيل واحد في إسكندرية، وكان تحت قاعد رمسيس نجيب المنتج العظيم، ووأستاذ حسن الأمام وصلاح جاهين، قالولي أطلع نزلها، أقنعها، قولها بس نعشيها في حتة وخلاص عشان نغير جو ونصور بكرا وإلا مش هنصور، طلعتلها قولتلها أنا من إسكندرية وعايز أأكلك أكلة بسيطة كده ونرجع ننام على طول، ومعانا المخرج والمنتج وصلاح جاهين مستنينك.
وتابع: اقتنعت ونزلنا ورحنا مطعم شهير جدا في ذلك الوقت، وكان فيه 4 عازفين، وأنا متعود أمسك اليكروفون وأغني، وكانت نجلاء قاعدة مهمومة، روحت أنا قايم ماسك الميكروفون وغنيت أغنية فرنساوي، بعد شوية لقيتها بتتفاعل مع الأغنية، ووراها قاعد الأستاذ حسن الإمام بيقولي استمر.
وأضاف: فجأة لقيت أستاذ صلاح جاهين، بيندهلي وكاتب على ورقة بفرة على نفس النغمة لأغنية الفرنساوي، أغنية محتار أنا ويا البنات وقالي غنيها بالعربي، بدأت أغني بالعربي الغنوة اللي أنا مش حافظها ونجلاء كانت بتتفاعل وترقص مع الأغنية، وخدت حوالي نص ساعة والناس بتسقف، ولما قعدنا كانت نجلاء فكت خلاص.
وأختتمت حديثه عن الأغنية قائلا: لقيت رمسيس نجيب، متعرفيش مبسوط، ولا زعلان ولا إيه، وقال يا حسن الإمام، الغنوة دي هنحطها في الفيلم وهنصورها بعد بكرا في المنتزه، بكرا تتسجل في المكان ده اللي إحنا فيه تسجيل كروكي كده ولما ننزل مصر نبقى نسجلها في أستوديو.
