هاني شاكر عن السماح لمطربي الراب بالعمل: مش هحاسب حد عايز يغدي النونة لكن همنع الكلام الخارج
تحدث الفنان هاني شاكر نقيب المهن الموسيقية، عن أزمة منع مطربي المهرجانات الشعبية، مقابل السماح لمطربي الراب بالعمل.
وقال الفنان هاني شاكر، خلال الجزء الثاني من لقائه في برنامج حبر سري، الذي تقدمه الإعلامية أسما إبراهيم، عبر قناة القاهرة والناس: الراب فن جديد شبابي أنا واحد من الناس مبفهموش ومبسمعهوش، مش معنى كده إني أرفضه أو مشجعش مغنيه، ومعنديش فكرة عن الراب والتراب.
كما علق الفنان هاني شاكر، على أغنية مش فير لويجز: من كام سنة؟ متجبليش أغاني من سنتين تلاتة، ويجز مبقالوش 6 أو 7 شهور في النقابة، ولو الكلام ده في حاجة خارجة هيتوقف، هشوف كلام الأغنية كله مكتوب الأول، ولو طلع فيها كلام خارج هيترفض وهننذر ولو اتكرر هيتوقف.
وتابع نقيب الموسقيين، موضحا أنه لم يعطي عضوية النقابة لمطربي الراب بسبب حب عائلته لهذه النوعية من الأغاني قائلا: مش عائلتي أنا قولت ابني ومراته راحوا حفلة لويجز، وابني مقاليش إنه شاف حاجة خارجة، والكلام اللي اتقال مش ده اللي بنقيس عليه، هل بتقيسي ده باللي قاله حسن شاكوش على المسرح؟.
وأضاف: أنا اللي يهمني هو بيغني صح ومفيش نشاز، هو في كلام هايف ومعرفش إزاي الشباب بيربطوا كلام الراب ببعضه، واللي يهمني أن ميكونش في كلام خارج وأنه يكون بيسف، أنا مش هحاسب أنه عايز يأكل النونة، ولكن هحاسب اللي عايز يقول كلام خارج.
واستطرد: مقدرش أمنع اللون ده ولكن أقدر أمنع اللي مش عضو في نقابة، مقدرش أتحكم في الذوق العام، وواضح إن في إيد بتزق ناس للسكة دي بفعل فاعل، في ناس عايزة ده وعايزة تشوف المصريين كده، إحنا ادينا الفرصة للناس دي بسبب أننا مبقيناش نعمل حفلات زي الأول.
