بين الأمهات
مؤسس أمهات مصر تشرح كيفية التغلب على التوتر والقلق أثناء الامتحانات
تعيش الأسر المصرية؛ أجواء امتحانات نصف العام، وسط حالة من الضغط والتوتر، خاصة بين أولياء أمور طلاب الصف الرابع الابتدائي؛ الذي يؤدون الامتحانات غدًا السبت، بنظام التعليم الجديد، والذي يطبق عليهم أول مرة هذا العام.
في هذا السياق، طرحت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، سؤالا على أولياء الأمور؛ تضمن: بما إننا في فترة امتحانات.. إزاي نقدر نتغلب على الخوف والفزع من الامتحانات.. فين الأمهات الشطار يفيدونا؟.
وتفاعل أولياء الأمور من الأمهات على صفحة اتحاد أمهات مصر للنهوض بالتعليم، فيسبوك، حيث قالت ولي أمر: التوتر والقلق والخوف؛ أكيد هما المسيطران على الأجواء وده الطبيعي، لكن بنحاول بقدر الإمكان منوصلش الإحساس ده لأولادنا، ونعطيهم الثقة بنفسهم، خاصة وإننا عاملين اللي علينا والباقي علي الله، إن الله لا يضيع أجر من أحسن عملا.
وأضافت ولي أمر: "والله بنحاول نشجعهم ونتكلم معاهم انهم يعملوا اللى عليهم والباقى على ربنا، وبنحاول نساعدهم على قد مانقدر نذاكر شوية ونقعد مع بعض شوية، نتكلم بعيد عن المذاكرة بفصلهم شوية من المود واعملهم عصير أو نسكويك دافئ، وبيرجعوا يكملوا مذاكرة تانى وربنا معانا جميعا إن شاء الله".
وذكرت ولي أمر أخرى: عادة أنا شخصيا بكون متوترة وقلقانة جدا، لكن بحاول أبسط الأمور، وأننا لما نعمل اللي علينا ونذاكر بكل طاقة وجهد، والأهم بتركيز هنوصل لنتيجة مرضية والباقي على ربنا، إنما الأهم دورنا بالمذاكرة أولا بأول، ومهما كانت الدنيا صعبة؛ نبسط الأمور، ونهدي نفسيتهم للوصول لأفضل النتائج،
وربنا مع أولادنا جميعا.
فيما قالت ولية أمر طالب آخر: رابعة ابتدائي والثانوي بجد ربنا معاهم، بحاول إني أقلل التوتر بس غصب عني متوترة ومش عارفه أداري ده، فيا ربي بحق تعبنا وتعبهم تجعله صلاح وخير وفلاح وتفوق إن شاء الله.
وأخيرًا أضافت ولي أمر أخرى: نعلمهم السعي والاجتهاد، ونسيب النتيجة على ربنا، ونعلمهم نرضى بالنتيجة مدام عملنا اللي علينا، ومش لازم نقفلهم على الدرجة والدرجتين، مفيش داعي نستنزف مجهودهم وطاقتهم من وهم صغيرين.
