عمرو أديب بعد غلق سنتر للدروس الخصوصية بالعجوزة: دي جريمة تعليمية
عقب الإعلامي عمرو أديب، على غلق وتشميع مركز للدروس الخصوصية بشارع السودان بالعجوزة، قائلًا: إحنا الدولة الوحيدة في العالم اللي عندها حاجة زي كده.
وقال أديب، خلال برنامجه "الحكاية"، المُذاع عبر فضائية "mbc مصر"، مساء اليوم الأحد: دي جريمة تعليمية لا توجد في أي مكان في العالم خصوصًا مع انتشار إصابات متحور أوميكرون.. وأتحدى تلاقي حاجة زي دي من أمريكا لأستراليا. متسائلًا: لو كان نظام التعليم من خلال مراكز الدروس الخصوصية أفضل نقفل المدارس ونكمل بالنظام ده.
قدرنا نستحدث نظام ثالث للتعليم
وتابع مقدم برنامج "الحكاية": واضح إن المدرسين في السناتر والمراكز عباقرة وأصحاب قدرات خاصة والمكان ده كان بيتردد عليه الآلاف من الطلبة يوميًا. متابعًا: في مصر قدرنا نستحدث نظام ثالث للتعليم، لدينا تعليم حضوري وتعليم عن بعد بالإضافة للتعليم عبر السناتر.
وأضاف الإعلامي عمرو أديب: السنتر اللي اتقفل النهاردة كان فيه أكتر من ألف طالب، طيب أنا هعتبر العدد 500 طالب فقط.. هل كل الناس دي مش بيفهموا حاجة في المدرسة، أكيد السنتر مش لسه مفتوح إمبارح يعني.. لكن أنا بحيي الشرطة أنها تمكنت من تشميع السنتر اليوم.
مفيش واحد لابس كمامة
وواصل أديب: بنصرف مليارات على المدارس.. وغير كده التجمعات في السنتر رهيبة.. ومفيش واحد لابس كمامة.. يعني "عطسة واحدة" تبهدل الدنيا.. وصلنا لمرحلة إن بقى عندنا جريمة في التعليم.
وأعلنت محافظة الجيزة، غلق وتشميع ومصادرة محتويات أكبر قاعات مراكز الدروس الخصوصية بشارع السودان بالعجوزة يتوافد عليه مئات الطلاب على مدار اليوم.
وتم توجيه حملة مكبرة على المركز، وغلقه وتشميعه مع مصادرة محتوياته والذي تسع إحدى قاعاته لحوالي 1000 طالب، وتم إخلاءه من الطلاب واتخاذ الإجراءات القانونية بحق المخالفين.
