إلهام شاهين للبرلمان عن أصحاب ولا أعز: أنتم مش أوصياء على الجمهور
دافعت الفنانة إلهام شاهين، عن فيلم أصحاب ولا أعز، والذي واجه العديد من الانتقادات اللاذعة مؤخرا على مواقع التواصل الاجتماعي، وذلك بعد عرضه على منصة نتفلكس.
وقالت إلهام شاهين شاهين من خلال مداخلة هاتفية في برنامج مصر جديدة مع الإعلامية أنجي أنور على شاشة ETC: الفيلم بيناقش قضايا مهمة، زي تعامل الأباء مع المراهقين، يعني في الفيلم الأب ساب لبنته حرية الاختيار بين أنها تبات عن صاحبها أو لا، ومش كل الأباء هيوافقوا على وضع زي دا، بس في أبهات بتوافق عادي وبيسيبوا ولادهم ياخدوا القرارات ويتحملوا نتيجتها بنفسهم.
وواصلت: في أباء عقلهم متفتح بزيادة وبيفكروا بطريقة أوروبية مش شرقية، والفيلم بيوريك أن الأب لما اتناقش مع بنته بشكل حضاري وأعطاها حرية الاختيار، قررت إنها مش هتبات عند صاحبها، وهتسمع كلام والدها، والفيلم بيقولك خليك صديق لأولادك وأنصحهم وعرفهم الصح من الغلط، وسيبهم هما يختاروا، وعلشان الأب في الفيلم ديمقراطي جدا، بنته اختارت الصح دون إجبار.
إلهام شاهين تهاجم الدعوات القضائية ضد الفيلم
وهاجمت إلهام شاهين، الدعوات القضائية ضد الفيلم، قائلة: البرلمان ماله ومال نتفلكس، ده فيلم من إنتاج لبناني ومعروض على منصة إلكترونية أمريكية، هو مش فيلم مصري ولا إنتاج مصري، وأنتم مش أوصياء على الجمهور، والجمهور بيشوف على نتفلكس أفلام أجرأ بكتير.
واختتمت إلهام شاهين حديثها، قائلة: وأصحاب ولا أعز مفيهوش حاجة خالص، ما عدا وجود شخص مثلي، وكمان مخبي ميوله عن أصحابه، وأنا لو مكان منى زكي لو اتعرضت عليا شخصية مريم هقبل أجسدها طبعا.
