عيطت على وفاة أمي الحقيقية.. يحيي الفخراني يكشف أسرار ليالي الحلمية
تحدث الفنان القدير والدكتور يحيي الفخراني، عن كواليس مسلسل ليالي الحلمية، وكشف سبب اعتذار سعيد صالح عن المسلسل، بجانب الحديث عن وفاة والدته أثناء تصويره مسلسل ليالي الحلمية.
وقال يحيي خلال لقائه مع الفنانة والإعلامية إسعاد يونس في برنامجها صاحبة السعادة عبر شاشة DMC: أنا لما شوفت السيناريو قولت أنا عايز أعمل سليم البدري، وبعد 5 حلقات فقط قولت أن المسلسل دا هيكتب في التاريخ ما قبل ليالي الحلمية وما بعد ليالي الحلمية حاجة تانية، وكان باين في الورق، وأنا كنت عارف أنه هيكون مسلسل عظيم.
وواصل: سعيد صالح هو اللي كان هيجسد شخصية سليمان غانم، ولكنه اعتذر وحاولت أقنعه وروحت له الأستوديو، وقالي أنه اعتذر عن المسلسل لأن عنده مسرح وبيسهر مع أصحابه، قالي إنه هيصور ساعتين بس في اليوم، وطبعا دا مينفعش لأنه بيجسد شخصية بطل، واللي جسد الدور بداله هو صلاح السعدني.
مشهد وفاة أمي تحول إلى حقيقة
وأضاف الفخراني: في الجزء الثالث من ليالي الحلمية حد اقترح يغيير التتر وأنا اعترضت، وأكتر مشهد بحبه مع أنه مش سهل في نفس الوقت، هو مشهد وفاة أمي هدى سلطان؛ لأن ساعتها أمي الحقيقية ماتت والمشهد تحول إلى حقيقة، ومعرفتش أوقف عياط لحد ما مشيت.
واختتم يحيي الفخراني: أنا أمي كانت ست حنينة جدا، وكان اسمها الست توحيدة، ولميس زوجتي كانت بتحبها جدا وهي بعد ما خلفت بقت زي أمي، وكان نفسها تجيب بنات ومكنتش عايزة تخلف بعد شادي، ولما اتجوزوا بقت تعتبر زوجاتهم بناتها.
