سمير صبري: أمير سعودي حقق أمنيتين لـ تحية كاريوكا وعاشت في شقة هدية من كويتية
سرد الفنان سمير صبري تفاصيل أمنيتين للراقصة الراحلة تحية كاريوكا، خلال حلقة نقاشية بعنوان فن العمر الجميل، على هامش فعاليات معرض القاهرة الدولي للكتاب بدورته الـ 53.
وقال سمير صبري: تحية كاريوكا كانت ست جميلة أو ي وبتعتبرني ابنها وعرفتها في آخر 10 سنوات من عمرها، بعد طلاقها من فايز حلاوة، وعاشت في شقة أهدتها لها سيدة كويتية لتعيش بها.
وأضاف: كانت تقولي عملالك البن اللي بتحبه وأروحلها، وفي مرة بتقولي عارف يا سمير نفسي أعمل عمرة وبقالي مدة مروحتش من بعد ما حجيت، وقالولي هناك فيه مستشفى حلوة للعيون أعمل عملية عيني بس مش معايا فلوس.
وتابع سمير صبري: وبالصدفة كنت في حفلة بنفس اليوم بها رجل يدعى عادل بغش يقول لي سمو الأمير فيصل بن الأمير فهد يعرف إنك قريب من تحية كاريوكا، ولو احتاجت حاجة قولي، فقولت له على أمنيتها وأداني رقم تليفونه.
تحقق أمنية الراحلة تحية كاريوكا
واستكمل سمير صبري حديثه، قائلًا: ورد عليا بعد يومين وبالفعل راحت عملت العملية والعمرة، وفي يوم تاني قالت لي نفسي اروح إسكندرية، وبردو في نفس اليوم قابلت الراجل اللي اسمه عادل بغش وقالي سمو الأمير بيسأل مش محتاجة حاجة؟ قولتله نفسها تسافر الإسكندرية، ولقيته بيقولي تاني يوم، فيه كابينة على البحر في المعمورة موجودة للست تحية وبها كل مستلزماتها وقعدت هناك شهر.
