بسنت شوقي: الخيانة ممكن تهدم علاقتي بـ محمد فراج
كشفت الفنانة بسنت شوقي الموقف الذي يمكن أن يُصدر من زوجها الفنان محمد فراج ويؤدي لهدم علاقتهما، موضحة أن علاقتهما مر عليها ما يقرب من 5 سنوات ونصف.
وقالت بسنت شوقي خلال حوارها مع الإعلامي أنس بوخش ببرنامج AB talks، برفقة محمد فراج: أعتقد أن الخيانة يمكن أن تكسر علاقتنا، ومقدرش أعدي خيانة، لأن فيه ثقة كبيرة جدًا بينا، وفيه إحساس إنه لأ مش محطوطة في دماغي، وقد إيه إحنا قريبين وبنفهم بعض من النظرة، والخيانة هتلطشني وهتشككني في كل حاجة بينا، فحاسة إن ده الشيء اللي ممكن يكسر العلاقة، وفيه خطوط حمراء متفقين عليها، والخيانة في المرحلة دي هي اللي هتجيب آخرها.
وتابعت بسنت شوقي: على الأقل البني آدم يحترم نفسه والعشرة والأطفال والمِحَن اللي مروا بيها، حتى لو مفيش حب كبير، لأن ده عمل مش محترم فليه تبقى إنسان مش محترم.
فيما قال محمد فراج: المشكلة الكبيرة أوي إن ده لو حصل بعد حاجة كبيرة بنتوها مع بعض، تبقى دي الكارثة، وربنا يبقى بيحبك لو رضيت تكمل معاك وسامحتك، وقبلت تديك فرصة تانية؛ لأنك باني صرح كبير بينك وبينها، جيت دمرته بفعل قذر، وقصدي إن الرجوع بيكون صعب، ومش معنى إنك لو مش باني حاجة كبيرة بينكم يبقى الموضوع ده تمام، وفي كل الأحوال مش مقبولة.
وأجاب محمد فراج عن موقفه إذا واجه مشكلة الخيانة، قائلًا: مشكلتي إني مبنساش كتير مش معناه إن قلبي أسود، بس عقلي هو اللي منور أوي، ربنا أعطى الإنسان نعمتين حلوين أوي للبني آدمين وهما الإحساس والنسيان، بس ربنا إداني نعمة واحدة بس، ولكن أنا حاليًا مش عارف هيبقى رد فعلي إيه أو هعمل إيه؛ لأني لما بعيش الحالة بعيشها بكل جوارحي.
