دنيا عبد العزيز: عايشة بعد وفاة والدتي عشان ماموتش كافرة عند ربنا
كشفت الفنانة دنيا عبد العزيز تفاصيل جديدة من حياتها الشخصية، بعد وفاة والدتها، التي رحلت عن عالمنا منذ ما يقارب من عام ونصف، بعد صراعها مع المرض.
وقالت دنيا عبد العزيز، خلال حوارها مع القاهرة 24: مبقاش في حياة ولا متعة بعد موت والدتي، وعايشة عشان ماموتش كافرة عند ربنا، ولو بإيدي أروح لربنا كنت هروح ولكن ده قضاءه.
وِأشارت عبد العزيز إلى أن الحياة تغيرت كثيرا بعد رحيل والدتها، لأنها كانت العقل المدبر والمخطط في حياتها، قائلة: دلوقتي بمشي بإحساسي وبفضل أفكر هل لو قرأت الورق والسيناريو كانت والدتي هتوافق عليه ولا لا؟، وهي مشيت وسابت لي ميزان، وربنا خلاني حكيمة وناضجة فجأة بعد موت أمي.
دنيا عبد العزيز: مشاهدي في مسلسل البرنس كانت حقيقية
وتابعت: مسلسل البرنس من أكثر المسلسلات اللي أخذت عليه جوائز ولم أستلمها، وبعد الوفاة سافرت وقفلت تليفوناتي واختفيت، والناس بقت تكلمني تقولي تعالي في جائزة لازم تستلميها، فكنت بقولهم أنا كنت بطلع أخد الجائزة عشان هي تسقف لي.
وأضافت عبد العزيز: مشاهدي في مسلسل البرنس كلها حقيقية وكنت موجوعة، ووقتها والدتي كانت في عز تعبها وكنت بروح اشتغل وقلبي بيتقطع، ومكنتش متخيلة أبدا إنها هتموت، ولما كنا في العناية المركزة كنت واثقة إننا هنرجع البيت سوا.
واختتمت الفنانة دنيا عبد العزيز حديثها: مش بخاف من الموت نهائيًا، أنا حاسة إن ربنا سابني في الدنيا عشان أعمل خير لأمي، وأفضل أدعي لها بالرحمة.
