عمرو سلامة: كنت بوزع أفلامي في الكافيهات عشان أتعرف
كشف المخرج عمرو سلامة أنه أخطأ في فيلم أسماء سينمائي، الذي عرض عام 2011 وشارك فيه كوكبة من النجوم.
وقال عمرو سلامة خلال ندوة مناقشة تجمع صناع فيلم برا المنهج، والتي تقام حاليًا في مكتبة الإسكندرية: غلطت في فيلم أسماء، واكتشفت في المونتاج، إن كان في 58 قطعة موسيقى، وده غلط، وأنا كنت مقرر أعمله من غير مزيكا، عشان أعلم نفسي إن شحنتي العاطفية تطلع من التمثيل والصورة، من غير ما أغشش الجمهور اللي عايز أقوله.
وتابع سلامة: أنا مقتنع إني لحد سن الـ 40 بتعلم، مازحًا الجمهور قائلًا: خلاص بتمهم للأسف، بس برضه شايف إن الحياة تبدأ بعد الأربعين، ولسة بكتشف أنا مين، وأعتقد ده هيحصل بعد الـ 40، ولحد دلوقتي بجرب حاجات مختلفة عشان اتعلم.
وأضاف: أنا كنت بطبع أفلامي القصيرة واوزعها في الكافيهات، واحط رقمي عشان المنتجين يكلموني، أنا حتى مكنتش بصور بالموبايل، فقط كنت بصور بكاميرا بنت خالة صحبتي.
وأختتم سلامة: أفلام شيكو كانت بتتوزع على هاردات، والمنتجين بيدوروا عليهم عشان يشتغلوا معاهم، وكانوا بيمنتجوا على كمبيوتر بالتقسيط.
آخر أعمال المخرج عمرو سلامة
ويعد فيلم برا المنهج، آخر أعمال المخرج عمرو سلامة، والعمل من بطولة النجم ماجد الكدواني وروبي، وشريف الدسوقي، وأحمد أمين وآخرون، والعمل من إخراج عمرو سلامة وتأليف خالد دياب، ومن إنتاج شركة Lagoonie للإنتاج الفني.
