نجوى فؤاد: الراقصات الأوكرانيات لبسهم مفتّح ولازم يكون عليهم رقابة لأن مصر فيها تقاليد
كشفت الفنانة نجوى فؤاد عن رأيها بالراقصات الأوكرانيات، مشيرة إلى أن ملابسهن لا تناسب عادات مجتمعنا الشرقي، بجانب الحديث عن إعجابها بـ رقص فيفي عبده ودينا.
وقالت نجوى فؤاد في تصريحات تليفزيونية: فيفي بتسأل عليا وزارتني من سنتين، بس بقت بتقفل التليفونات ومش بعرف أوصلها، ودينا من أحلى الناس وبتحب الناس كلها، وليها ستايل معين، ودول اللي بحبهم وبحب أتفرج عليهم في الرقص.
نجوى فؤاد: غضابة من لبس الراقصات الأوكرانيات
وواصلت: أنا غضبانة من لبس الراقصات الأوكرانيات، ولازم يكون عليهم رقابة، ولبسهم كله شبابيك ومفتح ولازم يتوجهوا يلبسوا إزاي لأنهم في مصر، وهي بلد فيها تقاليد، وهما عندهم عادي بس عندنا لا، وأنا اللي عملت الشيفون على فتحة البطن لأني مكنتش عارفة أرقص باللبس المفتوح دا.
نجوى فؤاد: محدش بيسأل عليا في الوسط الفني
وعلى جانب آخر، أعربت نجوى فؤاد عن حزنها الشديد لعدم سؤال الفنانين عليها، باستثناء الفنانة نبيلة عبيد، حيث قالت: مفيش حد في الوسط الفني بيسأل على التاني ليه؟ حرام مش عشاني أنا عشانّا كلنا، واحنا اللي بنحب بعض وبنجري ورا بعض وبنتمنى الخير لبعض، وحبوا بعض هتلاقوا الخير.. والفنانة فيفي عبده آخر مرة سألت عليا من سنة، واتشغلت بعد كدا بأعمالها الرمضانية، وعدم سؤالهم مش مأثر على حالتي النفسية؛ لأني عارفة أن كل واحد مشغول في أعماله الفنية.
