قصائد رمضانية.. الكنفاني للشاعر مسعود شومان
الشاعر والباحث مسعود شومان رئيس الإدارة المركزية بقصور الثقافة من مواليد 16 يناير 1966 له إسهامات ثرية في الشعر العامي، وصدر له عدد من الدواوين، منها عارف يارب، قبل ما يردموا البحيرة، وله دراسات نقدية مهمة في الأدب الشعبي والأنثروبولوجية، وهذه قصيدة له بعنوان الكنفاني بمناسبة شهر رمضان المبارك.
قصيدة الكنفاني
كتَبْ التاريخ بالنور تانى
وقال بأشواقه أغانى
ولا حد زى الكنفانى
ملك الكنافه مع الجلاش
واقف على الفرن يرشْرَشْ
ويقول كنافتى مش ببلاش
قاعده بتضحك ع المفرش
تتلف بإيدين العجان
عروسه لابسالك تُلى
وبسحرها ع الناس بتبان
وبسحرها تطل تقول لى
باين عليك م الشوق خايف
استنى حبه يا قطايف
لما أشوف شعرها لابْيَض
قام الرقاق بدراع ناشف
قال بُكره جاى وها تتعوض
والسكر المعقود شايف
جُلاشى قال أنا رايح فين؟
خطفونى من أحلى شفايف
عين الجمل واللوز وليفين
داب الرقاق تحت لسانى
فى البرد متغطِّى بلحافين
صحيت عجينتى اللّبَانى
وقالت الفاحت نازل
أما اللى طالع كان بانى
ولا حد زى الكنفانى
ما فضلش م السكر حاجه
لَفِةْ كنافتى حرير ناعم
غُرَيْبِه وبنت نواعم
بتغنى آه فوق الصاجه
تقولش حتة دندورمه
لوحدها ومش محتاجه
حبة كنافه من البورمه
بيرقصوا فى صينيه نحاس
والخبط نازل ع الأورمه
وبيسمعوا سيد حواس
فى قصة الناعسه وابوزيد
طب قولى راحت فين الناس
والبقصمات جاى متخرشم
قامت الكنافه وِمَادَّه الإيد
مليانه بُندق متحشم
مع لوز بيستنى الأكيل
وانا كنت قاعد متعشِّم
فى السقعه لابس بالطو تقيل
يخْمَر عجين الليل ويبان
زى اللبان ملتوت صايم
أنا برضه زيُّه ساعات هايم
وساعات خمران
اتبسمت إيد العجان
وكل مايله ولِيْهَا ميزان
على الكنافه ناديت ردِّت
عيان بياكل من ردة..
عيش الغلابه اللى بيصبر
تحت المرار سِكن السكر
ياما جروح مشيت عدِّت
لو مره بابى قَفَل سَنْكَر
باكل قطايفى وانا مرتاح
رزق الغلابه على الفتاح
الحمد ليك دايمن بشكر
كتب التاريخ بالنور تانى
وقال بأشواقه أغانى
ولا حد زى الكنفانى
ملك الكنافه مع الجلاش
واقف على الفرن يرشْرَشْ
ويقول كنافتى مش ببلاش
قاعده بتضحك ع المفرش
تتلف بإيدين العجان
عروسه لابسالك تُلى
وبسحرها ع الناس بتبان
