متهمة بقتل خطيبها في إمبابة: عاشرني معاشرة الأزواج وكان عندي أمل يتجوزني
قالت صابرين. ج 21 سنة، المتهمة بقتل خطيبها بالاشتراك مع شقيقها مصطفى، إنها عاشت 40 يوم داخل منزل أسرة خطيبها المجني عليه، بسبب عدم رغبتها في العيشة مع أسرتها المنفصلة، مشيرة إلى أنه في تلك الفترة عاشرها المتهم معاشرة الأزواج، وأوهمها بزواجهما، بعد أن أخذ والده صورة البطاقة الشخصية من أجل الزواج العرفي.
وأكدت الفتاة أن هناك مشاجرة حدثت عادت بعدها الفتاة إلى منزل شقيقها، والذي أجبرها على الاعتراف بتفاصيل الـ 40 ليلة التي قضتها الفتاة مع خطيبها، وروت له القصة ليدبر خطة الانتقام لشرفه من الصديق الخائن.
هربت من أهلي وعاشرني 40 يوما
تحقيقات القضية رقم 21714 لسنة 2021 جنايات قسم إمبابة، والمقيدة برقم 4819 لسنة 2021، متهم فيها كل من مصطفى. ج، وشقيقته صابرين. ج، بقتل شاب يدعى كرم، عن طريق استدراج المتهم الأول للمجني عليه إلى مكان وقوع الجريمة، وانهال عليه ضربا بسلاح أبيض أمام شقيقته، التي اصطحبها شقيقها معه أثناء ارتكاب الواقعة، بزعم حل الخلافات مع خطيبها.
قالت صابرين أمام جهات التحقيق: اللي حصل إنه كان فيه مشروع خطوبة بيني وبين كرم فرغلي، وبعد كده حصلت مشكلة عائلية بينا، وسيبنا بعض وخد الشبكة بتاعته، وبعد ما خدها اتصلت عليه علشان نرجع الموضوع، وهربت من بيت أبويا وخدت هدومي، وروحت قعدت عندهم حوالي أربعين يوم، وفي الفترة دي كرم عاشرني زي المتزوجون، على أمل أن هو هيتجوزني.
وتابعت المتهمة: أبوه كان واخد صورة البطاقة بتاعتي وخد بياناتها على أساس أنه هيجوزنا عرفي علشان أنا مش عاوزة أقعد مع أبويا وأمي علشان منفصلين، وبعد الأربعين يوم حصلت مشاكل بيني وبينه وسبت البيت عندهم، ورجعت بيت أمي، ومصطفى أخويا أجبرني أقوله على اللي حصل، روحت معترفة له أن كرم ضحك عليا، وخدني عنده البيت وعاشرني معاشرة الأزواج، لقيت مصطفي قالي أنا مش هسيب حقك، وهحاول أتكلم المعاه الأول وهجيبلك حقك، حاول يكلم كرم أكثر من مرة علشان يحل المشكلة، لكن كرم أتهرب منهأ ومصطفى قالي كلمي كرم عاوز أقابله، وروحت باعته لكرم رسايل إنه يقابلني، وانا حاولت أخلي كرم يقابل أخويا، وهو اتهرب وقالي اقابلك أنت الأول.
وأكملت المتهمة صابرين: مصطفي قالي روحي قابليه، وأنا هجيلك وروحت بعت رسالة، واتصلت أكتر من مرة على كرم من تليفوني، وبعد كده روحت على المكان، استنيت كرم لحد ما جه واتمشينا شوية وماكنتش أعرف أن مصطفي بيراقبني من الأول، وفجأة لقيت مصطفي في المكان داخل علينا بـ توكتوك ونزل من التوكتوك حط إيده على كتف كرم، وراح قالي أنا لسه مقابلها حالا، ولقيت مصطفى أخويا راح مطلع مطواه معاه وراح ضرب كرم بطعنات، وأخويا ضربه في بطنه وشدني وركبت التوكتوك معاه، وكرم كان فايق وكان بيضحك لأخويا وهو بيضريه، لكن أنا مكنتش أعرف أننا هنوصل لكده، وروحنا على البيت والحكومة جت خدتنا.
وقررت الدائرة 12 جنايات الجيزة، تأجيل جلسة محاكمة المتهمين الأشقاء مصطفى. ج، وصابرين. ج، لجلسة 28 مايو، في قضية مقتل شاب يدعى كرم. ف، والتي حملت رقم 21714 لسنة 2021، بعد أن استدرجوه لأحد الأماكن وانهالوا عليه بسلاح أبيض مطواة، مما أحدث إصابات متفرقة في جسده، نقل على إثرها إلى مستشفى القصر العيني، لكنه فارق الحياة قبل أن يكمل علاجه.
