هشام ماجد: شيكو وفهمي بنزيني في رحلتي الفنية.. وحملة فريزر محطة انفصالنا
كشف الفنان هشام ماجد، تفاصيل بداياته الفنية، ودراسته، بالإضافة إلى حديثه عن علاقته بالفنان شيكو، بعدما قدما العديد من الأعمال التي حققت نجاحًا كبيرًا منها مسلسل اللعبة بأجزائه.
وقال الفنان هشام ماجد خلال لقائه ببرنامج على اللوكيشن مع المذيع شريف الليثي عبر راديو هيتس: نقطة البداية كانت بدراسة هندسة، بس ماكنتش بحبها خالص، وفي آخر دراستي بكلية الهندسة عرفت إني عاوز أمثل، وبدايتي في شارع الفن لما بدأنا نعمل أفلام ونألفها ونصورها بكاميرا فيديو.
وأضاف: عملنا أربع أفلام بالجهود الذاتية، وبعد فيلم رجال لا تعرف المستحيل، حفظي كلمنا علشان نعمل برنامج أفيش وتشبيه، وسيبت الهندسة بعد فيلم سمير وشهير وبهير، ولما بلاقي الطريق قدامي مقفول بعافر وبحاول تاني، وفي أفلام بتقعد معانا سنين علشان نعملها زي فيلم الحرب العالمية التالتة.
وتابع هشام ماجد: بنزيني طول الرحلة هما أصحابي شيكو وفهمي كنا دايمًا بنشجع بعض وبنكمل بعض، والناس ابتدت تتصور معانا من أيام فيلم رجال لا تعرف المستحيل.
وعلق هشام ماجد على أهم المحطات في حياته، فقال: كان فيلم ورقة شفرة، أما فيلم الحرب العالمية التالتة، كان أكبر نجاح وأول محطة جابت إيرادات كتيرة، وأما فيلم حملة فريزر كانت محطة الانفصال للثلاثي، وأول محطة لوحدي كان فيلم حامل اللقب، وشيكو هو اللي معايا من أول الطريق لحد دلوقتي.
واختتم قائلا: أمي ومراتي وبناتي أكتر ناس بتخاف عليا أكتر من نفسهم كمان، وهوقف الطريق وهقفل الشارع علشان أتصور مع دكتور مجدي يعقوب.
