عصام شعبان عبد الرحيم: محمد رمضان بيقلد أبويا وبيلبس زيه.. وحمو بيكا بيصطنع طريقته
تحدث عصام شعبان عبد الرحيم، عن رأيه في مطربي المهرجانات، ومنهم حمو بيكا، مشيرًا إلى أنهم يقلدون والده الراحل.
وأضاف عصام شعبان عبد الرحيم، خلال لقائه في برنامج سابع سما، تقديم الإعلامية راغدة شلهوب، عبر قناة النهار: أي واحد نفسه ياكل عيش ويقلد أبويا؛ هشيله فوق دماغي وأسقف له، محمد رمضان بنفسه، اللي هو بطل، مش أي واحد يعني، بيلبس زي أبويا بالظبط.
وأشار إلى أنه حريص على ارتداء نفس استايل والده، قائلًا: بلبس من أشرف فجلة اللي كان أبويا بيلبس من عنده، وكل العيال اللي موجودة، حمو وغيره، بيقلدوا أبويا.
ولفت إلى أنه لا يشعر بالضيق من تقليد البعض لوالده، لكنه يستاء من اصطناع طريقة والده، قائلًا: مش بيضايقني أي واحد بيقلده، بالعكس، هحترمه وأحبه، لكن مش بحب حد يصطنع التلقائية، أبويا كان طيب حقيقي، ما ينفعش واحد يعمل طيب ويشبهُه بأنه ابن أو حفيد شعبان، زي ما قالوا عن حمو بيكا؛ لأنه كان بيعمل شوية حركات مصطنعة، ويطلع بيها قدام الناس، لكن أنا أبويا مكانش بيصطنع أي حاجة.
وأكد عصام شعبان عبد الرحيم، أن والده الراحل، كان يستاء من الأسامي الغريبة للمطربين، قائلًا: أبويا لو جاله مطرب بيغني حلو أوي، واسمه وحش؛ ما يوافقش عليه، يعني ما يوافقش على واحد اسمه كزبرة، الأسامي اتغيرت، يعني لما أخلف بنت؛ اسميها: بدنجانة؟، المفروض الأسامي دي تتمسح.
عصام شعبان عبد الرحيم: الليثي ماحضرش فرح بنتي وعرفت السبب
وعن خلافه مع المطرب محمود الليثي، قال، إنه طلب منه حضور زفاف ابنته؛ لكنه لم يأت، موضحًا: زعلت منه، وروحت خدت الكاميرا، وقعدت قدام الترب، واشتكيت لأبويا من كل اللي أنا متضايق منهم؛ لأني كنت عازم محمود في فرح بنتي ومجاش، وده أثر فيا أوي؛ لأن أبويا مكانش بيسيبه، وبنتي قالت لي: مش عاوزه حد غير محمود، بعدها لاقيته اتصل بيا، قال لي شعبان حبيبي، وخيره عليا، وإنه كان بيعمل عملية، قلت له: لو أعرف إن عندك عملية؛ كنت سيبت البنت وجيت لك.
