محمد محمود عن سمير غانم: كان يتفائل بوجودي في المسرح.. وآخر حديث بيننا كان نكتة
تحدث الفنان محمد محمود، عن الفنان الراحل سمير غانم، في ذكرى وفاته الأولى، والتي تحل اليوم، مؤكدًا أنه لم يرى في حياته مثل سمير غانم، وأنه كان فنان دائم العطاء، ومحب لـ عمله.
وقال محمد محمود في تصريح خاص لـ القاهرة 24: تعرفت على الفنان سمير غانم لأول مرة في مسرحية بهلول في إسطنبول، وسمير غانم من أفضل الفنانيين اللي اتعاملت معهم على المسرح، لأني اشتغلت معاه 5 مسرحيات، ولفينا فيهم الدول العربية كلها تقريبًا، وقضيت عمري معاه، وقعدت معاه في المسرح 15 سنة.
وتابع الفنان محمد محمود: نشأت علاقة طيبة جدًا بيني وبينه، وهو إنسان جميل وبسيط ومعندوش مشاكل مع أي حد في الوسط الفني، لا يكن الشر لأحد، وخدوم.. مفيش عنده غيرة أو حقد من فنان واقف معاه على المسرح، بل بالعكس بيساعده وبيعليه، وده نادر الوجود.
مواقف الفنان سمير غانم
وأضاف محمد محمود، أن الفنان سمير غانم، كان يتفائل بوجوده على المسرح، قائلًا: الكيمياء بيني وبين سمير غانم، كانت ربانية، هو كان بيحبني وبيقولي لو أنا مش واقف على خشبة المسرح في مشهد بس أنت بتبقى موجود.. أنا ببقى مطمن، ولو أنت وأنا مش على المسرح ببقى قلقان.
واستكمل: لما كان بيتعرض عليا عمل، وأرفض بسبب إنتاجي، كان يكلمني ويقولي لأ أنا عاوزك، وبتفائل بوجودك معايا.. كنت بوافق لـ رغبته، لأن الراجل حاببني بالطريقة دي، فممكن أضحي ببعض المطالب ليا، لأن أنا كمان حابب أكون موجود معاه.. مشفتش إنسان مبيكرهش حد في الدنيا زيه.. عمره ما أتكلم على حد وحش.
ونوه محمد محمود، بأن الفنان الراحل سمير غانم، كان حريص على قراءة القرآن قبل صعوده إلى خشبة المسرح، كما أنه كان دائم السعي في عمل الخير، مردفا: في أعمال خير محدش يعرفها، وفي مرتبات شهرية لبعض الناس بتروح لهم لغاية دلوقتي، مواقفه الإنسانية كثير جدًا، وهو لم يخذل أحد أبدًا، وكانت الابتسامة لا تفارق وجهه أبدًا، رغم تعبه.
واختتم الفنان محمد محمود، قائلا: آخر حديث مع سمير غانم؛ كان باعتلي نكتة، وهو طول الوقت بيبعت حاجات تضحك.. دي عادته، وما زلت على تواصل مع بناته دنيا وإيمي.
