أمير شاهين: تعلمت من إلهام حب الشغل والمواقف الجريئة
قال أمير شاهين، شقيق النجمة إلهام شاهين، إنها سبب في كل حاجة حلوة حصلتلي، واتعلمت منها حب الشغل والمواقف الجريئة وكل حاجة انا فيها بفضلها.
جاء ذلك خلال ندوة تكريم الفنانة إلهام شاهين، بملتقى القاهرة للسينما والدراما المصرية.
حنان مطاوع: فيه ناس حلوين قدام الكاميرا وبيحبطونا في الحقيقة
من جانبها أوضحت حنان مطاوع، في حديثها عن إلهام شاهين: بابا كان بيمثل معها في المشاغبين الثلاثة، وأنا كنت طفلة لسة، ومرة فيه حد ما أحبطني وبطلت أروح تاني، وبعدما ما والدي أقنعني رحت مرة تانية وقابلت إلهام ساعتها، وقالتلي تعالي نلعب مع بعض، وأنا مش عارفة أرد أقلها إيه، وجابتلي بسكويت وحلويات، ونسيت بابا بقى وحبيت إلهام جدًا، وبعد 10 سنوات سافرت معاها، ورحنا تونس، وهي بنفس الشخصية روحها حلوة، أنا بحبها مليون مرة، وهي إنسانة عظيمة.
فاطمة ناعوت: لولا هالة سرحان والهام شاهين كان زماني في السجن
وقالت الكاتبة فاطمة ناعوت: إلهام شاهين كانت بتدعمني في فترة كنت عايزة فيها انتحر، وجاتلي الفندق وعملتلي عيد ميلاد في فندق كبير وادتني فلوس، وأنا ابني عنده توحد، ومكنتش عارفة أعمل إيه، ولولاها وهالة سرحان، كان زماني في السجن.
وأضافت: هفضل مدينة بالفضل لهما طول عمري، وإلهام شاهين تنويرية، وفضلت مُصرة أنها تعاقب رجل اللي أهان كل ست في مصر، عبد الله بدر، ومحمود شعبان، وهي فنانة عظيمة ووطنية وتنويرية ومثقفة.
