طلاب إعلام عين شمس يعبرون عن حبهم لمعلمتهم بممر شرفي: والدكتورة: ربنا يجبر بخاطرهم ويسعدهم

في لفتة إنسانية تعبيرا منهم على رد الجميل لمعلمتهم، حرص طلاب الفرقة الرابعة بقسم الإعلام، كلية الآداب، جامعة عين شمس، على تكريم الدكتورة شيماء عز الدين، الأستاذ المساعد بقسم علوم الاتصال والإعلام بالكلية.

طلاب يكرمون دكتورة جامعية 

ونشر الطلاب فيديو للحظة تكريم معلمتهم، حيث وقفوا في ممر شرفي وسط تصفيقات حارة منهم، وقت مرورها، وسط فرحة عارمة من الطلاب ومعلمتهم.

وروت الدكتورة شيماء عز الدين تفاصيل تكريمها، قائلة: الموقف جه فجأة، مكنتش أعرف إن ده هيحصل، واليوم كان عادي، ووقتها كنت رايحة الجامعة عشان عندي امتحان وكنترول، وبعد ما الطلاب امتحنوا، حاولوا يوصلولي وينزلوني تحت في الحرم الجامعي بس من غير ما يقولوا فيه إيه.

دخول طلاب العلمي بالثانوية الأزهرية إلى اللجان لأداء امتحان اللغة الأجنبية الأولى

ضلمة وحر.. طلاب تجارة الإسكندرية يستغيثون بسبب تأجيل الامتحان لانقطاع الكهرباء

وأضافت عز الدين لـ القاهرة 24: بعد ما نزلت لقيتهم واقفين بالشكل الجميل ده، تكريما ليا وعلى اللي عملته معاهم الحمد لله، وشعوري ساعتها كان عبارة عن مشاعر مختلطة بين الفرح واللخبطة، مش مستوعبة إيه اللي بيحصل من جمال الموقف، إحساس جميل أوي، فعلا وصل من القلب للقلب.

الدكتورة تروي تفاصيل الموقف

الحمد لله ربنا جبر بخاطري وكان يوم من عمري ما يتنسيش.. هكذا عبرت الدكتورة عن شعورها لحظة رؤيتها الممر الشرفي لها، مضيفة: سمعت كلام حلو جدا قبل وبعد التكريم، ومعظمهم كانوا بيشكر فيا وفي مجهودي معاهم، وقد إيه فرحت بتعليقاتهم.

وتابعت: الحمد لله إني قدرت أوصل لهم المعلومات بشكل مبسط ويستوعبوها، مشيرة إلى أنها كانت تتوقع من طلابها كل خير، حيث بدا ذلك واضحًا لها منذ وقت طويل.

وأكملت: أنا فعلا بحبهم وكل كلمة اتقالت وصلت لقلبي، لأنها من القلب للقلب، وحقيقي كانت أحلى مفاجأة ومكنتش متوقعة خالص إنهم يعملوا كدة، وده ضاعف فرحتي بيهم وزود غلاوتهم عندي.

الدكتورة توجه رسالة لكل معلم 

ووجهت الدكتورة شيماء عز الدين حديثها لكل معلم وأستاذ جامعة، قائلة: إحنا بنقدم رسالة فلازم نؤديها بكل إخلاص وضمير، والمادة العلمية بتروح لكن اللي بيفضل العلاقات الطيبة مع الطلاب، وده بيزود مسؤوليتنا أكثر في تأدية الرسالة دي، عشان الطلاب يبقوا حابين المادة ومستوعبينها.

واختتمت حديثها موجهة حديثها للطلاب: أنا بشكركم على كل كلمة طيبة اتقالت لي، وعلى كل إحساس صادق وصل من القلب للقلب، شكرا على إنكم حسستوني إني عملت حاجة فعلا وإني كنت فارقة معاكم، وعمري ما أقدر أنسى اللي عملتوه عشاني، ربنا يجبر بخاطركم ويسعدكم.