غضب عارم.. هاشتاج محاكمة مبروك عطية يتصدر تريند تويتر
تصدر هشتاج محاكمة_مبروك عطية؛ تريند تويتر، وذلك بعد تصريحاته الخاصة بواقعة مقتل نيرة فتاة المنصورة على يد زميلها أمام الجامعة، مما أثار غضب المتابعين ورواد مواقع التواصل الاجتماعي.
المطالبة بمحاكمة مبروك عطية
ونشر الداعية مبروك عطية ڤيديو على صفحته الخاصة عبر فيسبوك وقال: حياتك غالية عليكى تبقى تنزلى من بيتك قفة.. لا متفصلة ولا بنطلون ولا شعر على الخدود.. ليه؟، هيشوفك ريقه هيجرى وممعهوش هيدبحك، يلا خليه يدبحك.
وأضاف: واقع..عرفتوا بقى، في واقع آخر للحجاب، ليس فقط بعدا دينيا، وإنما هو بعد خبرة بالمجتمع اللى حوالينا اللى عايزة الهفهف والمأمط.. يهفهف علشان مين يشوفه يا بت..والمأمط علشان مين يشوفه يا بت.
وأثار الفيديو غضبا عارما بين مستخدمي مواقع التواصل الاجتماعي مطالبين بمحاكمته ومعاقبته عما صرح به في الفيديو، كنوع من أنواع التحريض على القتل وإلقاء اللوم على الضحية.
ردود أفعال مستخدمي السوشيال ميديا
وعلق أحدهم عبر تويتر: أنا شوفت ڤيديو الراجل ده.. ده تحريض رسمي على الستات وتشجيع لأي حد إنه يأذي الستات..الراجل ده لازم يتحبس لازم الدولة تتحرك ويمنعوا الناس دي من إنهم يخاطبوا الشباب.
بينما علق أخر: خلي بالك يا راجل يا تعبان أنت أنا أختي منتقبة وأيام الجامعة كانت في سكن طالبات.. كانت لما تجيلنا إجازة بتحكيلي عن كم التحرشات اللفظية اللي بتقابلها ف الشارع والناس القذرة اللي بتعاكس.. ببقى هموت وأروح للناس دي أولع فيهم.. الموضوع ملوش علاق بالحجاب خالص.
وقال آخر: بلدنا طول عمرها الناس عايشة مع بعض كل واحد في حاله.. امنعوا المجاذيب من إن يكون ليهم صوت !!الناس اللي بتتكلم زي مبروك عطية دول أخطر على بلدنا من أي عدو خارجي.
وعلق مستخدم آخر: يعنى تنام على خبر واحد دبح واحدة عشان رفضته وتصحى على شيخ بيحلل دمك ودبحك في الشارع عشان مش ملتزمة بدينه ومطلوب منى أبقى متماسكة وأبقى بعمل شغلي بشكل كامل وأضحك في وش الناس وأبقى عندى سلام نفسى وعقلى عشان أربى أطفالي وأخدمهم ؟.
