محمد نجاتي: بشفق على أي حد عايز يدخل مجال التمثيل
تحدث الفنان محمد نجاتي، حول إمكانية دخول ابنائه الوسط الفني، وعملهم سواء في التمثيل أو الغناء، موضحًا أن المجال الفني صعب للغاية وأنه مشفق على من يريد دخوله.
وقال الفنان محمد نجاتي خلال حواره مع القاهرة 24: أنا مش بشفق على ولادي بس، أنا بشفق على أي حد يدخل الشغلانة دي، من كتر ما الناس مستسهلاها بيقولوا إيه المشكلة إني أمثل أو أغني، هو مفيش مشكلة خالص بس أدخل وشوف الشغلانة دي عاملة إزاي، منتهى تعب الأعصاب، ومنتهى سرقة العمر، الأيام بتجري وإحنا بنفكر في عمل فني، تلاقي فات من عمرك 5 أو 6 سنين كده دون أن نشعر وإحنا جوا الفن، بيسرق العمر بجد، ومهلك للأعصاب جدًا.
وأضاف محمد نجاتي: المجال محتاج موهبة غير التمثيل علشان يبقى في علاقات كبيرة ولو مفيش هتبقى كارثة عظيمة، وإلا هتفضل طول الوقت بتصرف على الشغلانة دي ومتاخدش منها فلوس، لو خلاص قررت تدخل المجال ده يبقى خلاص أنت ومجهودك وأنت ومبثابرتك وأنزل البحر وهات أخرك فيه.
محمد نجاتي
وعلى جانب أخر، افتتح الفنان محمد نجاتي أمس الخميس، مطعم وكافيه مملوكا له في مدينة العلمين الجديدة، بحضور عدد من أصدقائه وأفراد أسرته، وذلك بعد أزمته الأخيرة وتلميحه باعتزال الفن، وقال نجاتي، إنه فكر في افتتاح مشروعه الخاص بتشجيع من عدد من أصدقائه وبعض أفراد اسرته، لافتا إلى أنها أولى تجاربه في عالم إدارة الأعمال التجارية.
كما حرص نجاتي، على توجيه رسالة للشباب، من خلال كاميرا القاهرة 24، قائلًا: بقول للشباب متغلطوش غلطتي، أنا في الأول كنت بعيد عن موضوع البيزنس ده وكنت متفرغ تمامًا لموضوع التمثيل والسينما والدراما، بقول لكل شاب إتخرج الأول من الجامعة وأعمل أي مشروع وإبدأ بـ حاجة صغيرة هتكبر معاك طول ما أنت حاطط فيها ضميرك مؤمن بيها.
