أندرو محسن: تامر حسني بيعتمد على التوزيع في دول الخليج.. ومفيش مصدر رسمي لإيرادات فيلم بحبك
تحدث الناقد أندرو محسن عن جدل إيرادات فيلم بحبك لتامر حسني على مواقع التواصل الاجتماعي، حيث أكد البعض أن الإيرادات التي ينشرها تامر عن فيلمه غير صحيحة نظرًا لأنه لا يوجد لها مصدر مؤكد.
وكتب أندرو محسن عبر حسابه الرسمي على موقع فيسبوك: فيه حاجه كويسة الصراحة في الأرقام القياسية اللي بينزلها تامر على صفحته، الأرقام اللي ملهاش مصادر حقيقية وواضحة للأسف غير صفحته وتقارير قليلة جدًا.
وواصل أندرو: الحاجة الكويسة هي إنه بيعتمد على إيرادات التوزيع الخارجي عشان يقول إنه جايب إيرادات أعلى، ودي حاجة للأسف معندناش رصد حقيقي ليها في الأفلام المصرية، والتوزيع الخارجي، تحديدًا في دول الخليج، مهم من زمان وبيحقق إيرادات كويسة للأفلام، لكنه زاد بشكل أكبر بكتير مع افتتاح دور السينما في السعودية، اللي هي بقت بتحقق أحيانًا إيرادات أعلى بما لا يقارن بالإيرادات داخل مصر، وده لأسباب كتير ممكن الكلام عنها لاحقًا بس هي بالتأكيد بقت مصدر دخل مهم جدًا للأفلام المصرية.
وأضاف أندور محسن: وجود إنتاج ضخم مؤخرًا في بعض الأفلام، ضخم بمقاييس السينما المصرية، زي كيرة والجن مثلًا، فكرة الاعتماد على الإيرادات من شباك التذاكر المصري وحده أصلا مش منطقية، وأغلبنا بيعتمد على الإيرادات اللي بتذكرها بعض المواقع الإلكترونية داخل مصر، هيقدر أي حد يقول إنه بيحطم الأرقام القياسية، قياسية بناءً على أي قياس؟ ماحدش عارف بقى.
واختتم أندرو محسن حديثه مؤكدا على عدم دقة الإيرادات التي ينشرها تامر حسني لفيلمه بحبك، وذلك لأن لا يوجد مصدر رسمي للإيرادات في السعودية ودول الخليج حتى الآن.
