ابنة الموسيقار حسن أبو السعود: والدي مكنش هيرضى بالمهرجانات اللي فيها سُكر وحشيش
تحدثت رنا حسن أبو السعود، عن رأي والدها الموسيقار الراحل، إذا كان على قيد الحياة، في المهرجانات الشعبية، وإذا ما كان سيسمح بوجود هذا النوع من الأغاني.
وقالت رنا حسن أبو السعود، خلال حوارها مع القاهرة 24: كان هيرضى بالمهرجانات اللي كلامها طبيعي، ولكن الحاجات الغريبة اللي بتطلع دي اللي فيها سُكر وحشيش وقلة أدب وألفاظ خارجة طبعًا مستحيل يرضى بيها، لكن في العادي كان ممكن يعملهم بشكل كويس، ولا كان هيسمح بـألفاظ غريبة، ولا إنهم يتسموا بأسامي غريبة، ولا إنهم يقولوا في آخر الأغنية فلان اللي ألف وفلان اللي وزع.
أما عن رأيها في استقالة أمير الغناء العربي الفنان هاني شاكر، من منصبه كنقيب لموسيقيين، فقالت: أنا مع الفنان هاني شاكر، جدًا في قرارا تركه للنقابة، وإنه ميرجعش فيه، لأنه إنسان كان في حالة ورايق، وبيعمل مزيكا جميلة، دخل فجأة في أزمات شتائم وإهانات واتحط في مكان هو كان في غنى عنه، أنا شايفة إن موضوع النقابة ده صعب جدًا وصعب إنك ترضي كل الأطراف.
كما تحدثت عن تناول المشاهير والفنانين حياتهم الخاصة مع الجمهور، قائلة: أعتقد إن في مشكلة كبيرة، فمهما الفنان حاول يداري حياته الشخصية كده كده الناس هتعرف، وكمان بقي فيه إنستجرام وفيس بوك ومنصات التواصل الاجتماعي، غصب عن أي فنان هو بني آدم حتى لو سكت الناس هتعرف، دي مشكلة الشهرة.
