بهاء الدين محمد: شيرين عبد الوهاب لم تقصد الإهانة لـ حسن أبو السعود.. والراحل كان يحب فنها وبساطتها
علّق الشاعر بهاء الدين محمد، على تصريحات الفنانة شيرين عبد الوهاب عن الراحل حسن أبو السعود، والتي كانت حديث السوشيال ميديا في الساعات الماضية، إذ أشار إلى أن الفنانة لم تقصد الإهانة للراحل مطلقًا.
وكتب بهاء منشورًا، عبر حسابه الشخصي بموقع التواصل الاجتماعي فيسبوك، حيث قال: حبيبى اللي عمري ما حسيت إنه مش في الدنيا، واللى كل الوسط بيحبه، وكان وجوده في أي مكان بيعمل حالة من البهجة، بروحه الطيبة وقلبه اللي كله حب وفن.
وتابع الشاعر بهاء الدين محمد: الفنان اللي عملنا مع بعض نجاحات عايشة لحد النهاردة، ومنها آسف حبيبتى، لما النسيم، في ناس، أصعب حب، وعدا الليل، عمال يحكيلي عنها، ومئات الأغاني اللي كان بخبرته في اللايف، بيعرف يجيب الجملة، اللي الناس تحبها، وبالفعل سيطرنا سنين على الساحة الغنائية وغيرنا كتير.. ده غير أنه كان من أفضل العازفين على الأوكرديون في العالم.
وأضاف بهاء الدين محمد: في يوم من الأيام، وهو نايم تعبان لقيته ابتسم لي، وسألني أنت عارف مين أكتر حد هيزعل عليا لما أموت؟، قولتله اسم من أسماء ولاده، قالي لأ.. أنت أكتر حد هزعل عليه، وبالفعل أنا مابقيتش حتى أمشي من شارع بيته، وفضلت فترة طويلة أنسى إنه مات، لأنه عشرة فن وحياة، وكان بيحبني كأني ابنه، وكان بيفرحلي بكل نجاح حتى لو مش معاه، وأبقى أحكيلك إزاي اتقابلنا لأن الموضوع ده مهم.
وعن تصريحات شيرين عبد الوهاب، قال: المُهم علشان أقول اللي ضميري بيحسه في موضوع شيرين عبدالوهاب، واللي جهات كتير عايزاني أقول رأي في كلامها عنه أو وصفها.. أنا بكل صراحة أقول: ما حستش إنها قاصدة تهينه، ولا تسخر منه.. هي بس استدعت سيرته بشكل يبدو ساخرًا، لكن رغم إني متضايق منها، وعندي من أغلى الناس، إلا إن إحساسي قالي إنها ما تقصدش.
بهاء الدين محمديعلق على تصريحات شيرين عبد الوهاب
واختتم بهاء الدين محمد، قائلا: فعلًا لما كنا بنتقابل كان بيحتفل بشيرين، وبيحب فنها والبساطة اللي فيها، وهي كانت بتحبه وتحترمه، وللعلم أنا لما كنت بروحله وشبعان ومش طايق أشوف أكل، أول ما يقولي تاكل بأداء ما شوفتش زيه، بلاقي نفسي باكل.. الله يرحمه كان فنان ودمه خفيف وقلبه قلب طفل.
