سليمان عيد: قائمة المنقولات كلام فاضي.. واتجوزت وقبضي 37 جنيه
علق الفنان سليمان عيد على جدل قائمة المنقولات الزوجية الذي تصدر تريند مواقع التواصل الاجتماعي مؤخرًا، مشيرًا إلى أنه تزوج وكان مرتبه 37 جنيهًا فقط بالشهر.
وقال سليمان عيد لـ القاهرة 24: شايف أن جدل القايمة ده كلام فاضي، وأهم حاجة الحب ولو اتنين بيحبوا بعض هيواجهوا كل الصعاب، وأنا اتجوزت ومرتبي 37 جنيه في الشهر وعشنا أنا ومراتي على البصارة والفول سنين لحد ما ربنا كرمنا ومع ذلك استحملت معايا وحياتنا أتبنت وإحنا مع بعض.
وواصل سليمان عيد: الستات اللي زي مراتي مبقوش موجودين كتير ودول عملة نادرة في الزمن ده، ولكن لازم الأهل يشوفوا هل بنتهم بتحب الراجل اللي هتتجوزه ولا لا والعكس صحيح، لأن أهم حاجة الحب، وممكن الطرفين يعيشوا مع بعض ولو في أوضة.
كما تطرق سليمان عيد، للحديث عن شكوى بعض الفنانين من قلة الأعمال الفنية، مشيرًا إلى أنه تابع هذه الشكوى بالفعل ويرى أنهم ينقصهم بعض الإمكانيات من الناحية الفنية، مشددًا على أهمية عودة المسرح كما كان لأنه أساس اكتشاف المواهب الجديدة.
آخر أعمال سليمان عيد
وعلى جانب آخر، يعيش سليمان عيد حالة من النشاط على المستوى الفني، إذ شارك في العديد من الأعمال الفنية التي حققت نجاحا كبيرا، من بينهم مسلسل البيت بيتي مع الفنان كريم محمود عبد العزيز.
