إيمي تاتو بعد قرار وقف برنامجها على قناة الشمس: كبرتوا الموضوع وحب الناس مش بالفلوس
علقت إيمي تاتو، على حالة الغضب التي أثيرت على مواقع التواصل الاجتماعي بعد الإعلان عن تقديمها برنامجًا بقناة الشمس، قبل أن تقرر هيئة المكتب بالمجلس الأعلى لتنظيم الإعلام، وقفه.
أول تعليق من إيمي تاتو
وكتبت إيمي تاتو عبر صفحتها بموقع فيس بوك: الحمد لله والفضل كله لله قدر الله وما شاء فعل.. هو أنا بصراحة مش عارفة ليه حصل غضب علي السوشيال ميديا وخصوصا عند بعض الإعلامين وخصوصا المبتدئين.. الموضوع أخد أكبر من حجمه الموضوع كله كان فقرة في برنامج بتقدمه مذيعة أصلا اكتمال الموضوع أو انتهاؤه ولا فرق معايا.
وأضافت: أنا قبلته بناء عن طلب كثير من السيدات عن عرض بعض المعلومات والتجارب اللي تخص جمال المرأة وعلاقتها بالشعر والبشرة والتاتو، أنا اتعرض عليه كتير من التمثيل والظهور في برامج وحلقات خاصة وعرض قصة حياتي وعلطول برفض لأني فعلا تركيزي كله على شغلي.. وده البرنامج الوحيد اللي قبلته لأنه خاص بفقرة عن المرأة اعتبرته كدردشة زي مابدردش على بيدج المطبخ أو التاتو.. كبرتوا الموضوع أوي ودي معاها ودي معهاش، وهوه لا فارق عندي من الأساس.
وتابعت: أنا برفض أي عرض منتج كإعلان مع إن المكسب من وراه كتير.. أنا برفض لقاءات كتير مع صحافيين وقنوات معروفة جدا وكمان بمقابل مادي، أنا برفض دخولي في التمثيل مع إن كتير شجعني إني أقبل..برفض أستغل بيدجاتي لأي نوع من الترويج أو زياده الرتش..كل شغلي تاتوهات والمطبخ كحب دردشة معاكم وليس أكتر.
واستكملت: مع احترامي طبعا لقناه شمس وغيرها أنا اقدر على بيدج واحد من بيدجاتي مع أحلى فانز أوصلهم اللي عايزاه وتحت أمرهم في أي استفسار، وأخيرًا أحب أوصل معلومة خصوصا للإعلامين المبتدئين اللي شنه الهجوم وغيرهم.. حب الناس مش بيشتري بالفلوس حب الناس ده من عند الله ولا بالشهادات ولا التدريبات.. وأنا حب الناس ليا يسوى كنوز الدنيا.. واستنوني بالأحلى لايف اليوم بإذن الله.
