الحب الشرير

• خلال الأسبوع اللي فات كان فيه قصة حقيقية وغريبة ومؤلمة في نفس الوقت انتشرت في كل وسائل الإعلام والتواصل الاجتماعي الهندية وبعدها انتشرت كمان في معظم الصحف العالمية.. اللي حصل إن وبحسب ما تم ذِكره في موقع "Oneindia" إن فيه بنت هندية عندها 15 سنة -لم يتم ذِكر اسمها- من قرية "سوال كوتششي" في ولاية "آسام" في شمال شرق الهند كان بتحب شاب في نفس سنها بقالها تقريبًا 3 سنين.. الشاب ورغم إنه من قرية "حاجو" ودي قرية هندية تانية خالص وفيه مسافة بين القريتين؛ إلا إن قصة حبهم اللي بدأت من خلال فيسبوك كانت أقوى من المسافات، وزادت يوم عن التاني وشهر بعد التاني خصوصًا لما اتقابلوا أكتر من مرة في مكان وسط أو في قرية الشاب!.. طب ها وبعدين؟.. إحنا بنحب بعض واتأكدنا من كده، إيه بقى الخطوة الجاية؟.. نتجوز.. تمام.. بس بحسب الأعراف اللي في قرية البنت هتبقى فكرة إنهم يوافقوا على شاب من قرية تانية شيء مستحيل.. طب والحل؟.. نهرب.. هجيلك آخدك معايا ونهرب نتجوز بعيد.. وحصل فعلًا!.. 4 مرات على مدار شهور كان الولد يحط خطة محكمة والبنت تهرب معاه بس أهلها يكتشفوا القصة ويطاردوها ويرجعوها تاني وطبعًا مع كل مرة بيرجعوها كان الحصار عليها منهم بيزيد والوضع بيبقى أصعب بس برضه فضلوا الاتنين على تواصل.. 

هوب من كام أسبوع الولد اكتشف إنه مصاب بالإيدز!.. صدمة قاسية عليه وعلى البنت أكيد بالذات كمان إن الوضع الصحي بشكل عام في الهند مش ألطف حاجة وده كان شيء ظاهر أثناء أزمة كورونا في السنتين اللي فاتوا وبالتالي صحيح إن الأعمار في النهاية بإيد ربنا لكن استمرار حياة الولد أصلًا حاجة مش مضمونة!.. أنا لازم أكون جنب حبيبي.. هتعملي إيه يا بنتي بس؟.. ههرب وهروح له لحد عنده بحيث يطمن بوجودي جنبه.. تهربي؟.. مرة خامسة؟.. انتي مش بتحرمي!.. يعني يقتلوكي؟.. مش مهم الأهم أكون معاه.. نفذت خطة لوحدها وفعلًا راحت للمستشفى الصغيرة اللي الولد بيتعالج فيها وفضلت جنبه.. كانت بتقرا على النت معلومات عن الإيدز وهل فيه طريقة لعلاجه في محاولة منها للبحث عن أى مخرج.. وضع الولد كان بيسوء يوم عن التاني وبالتوازي هي إحساسها بالعجز كان بيزيد فقررت تعمل تصرف خارج حدود العقل والمنطق!.. من ضمن المعلومات اللي عينيها وقعت عليها وهي بتقرا طرق انتقال الإيدز.. معلومة في الطبيعي مالهاش قيمة لإننا بنتكلم عن واحد خالص مريض بالمرض بس هي قررت تستغل المعلومة دي في قرارها!.. جابت حقنة وسحبت شوية دم من حبيبها وراحت حقنت الدم الملوث بالإيدز بتاعه في دمها!.. والسبب؟.. عشان تثبت له إنه مش لوحده وإنها معاه لدرجة إنها هتبقى مريضة بالإيدز زيه!.. تصرف مجنون مايختلفش إتنين على جنانه ولا قلة عقل اللي عملته.. والنتيجة؟.. أعراض إعياء شديدة بدأت تظهر على جسم البنت اللي أصلًا ضعيف ومش مستحمل وفي نفس اللحظة قدر أهلها يوصلوا لمكانها ويرجعوها معاهم لبيتهم!.. الأهل عرفوا اللي حصل، وقدموا بلاغ في الشاب للسلطات المختصة على اعتبار إن ده حصل بمعرفته وموافقته وإنه ماعملش حاجة عشان يمنعه.. المشكلة في كده بس.. لما الدكاترة كشفوا على البنت اللي دخلت المستشفى بسبب تعبها المتزايد كلهم بعد وضعها تحت الملاحظة أكدوا إنها حتى لو حصل وخفت هتفضل تاخد أدوية باقي عمرها كله عشان يمنعوا الفيروس من تدمير جهازها المناعي!. 

• نيرة أشرف وسلمى بهجت بنتين فقدوا حياتهم في أقل من شهر ونص لمجرد أنهم رفضوا وقالوا لأ ولإن الشخصين المختلين اللي قرروا ينهوا حياتهم كان بيحركهم اللي كانوا فاكرين إنه حب!.. الحب اللي يغيب فيه صوت العقل مايبقاش حب.. بيبقى مش أكتر من مجرد شوية مشاعر لُطاف اتعاشوا، وشوية وقت حلوين طالوا ولا قصروا اتقضوا، وبيكون فيه اتفاق بين أطرافه إننا مش هنفكر في بكره المهم دلوقتي!.. قصص الحب اللي بتكمل هي اللي بتبتدي من عند القلب بس بيأيدها العقل.. والعقل بيقول إن مفيش حد بيحبك فعلًا هيسمح لنفسه إنه يضرك أو هيسمح لك إنك تضر نفسك حتى لو في المقابل هتبقوا سوا!.. فيه مليون طريقة تثبت بيهم للي بتحبه صدق مشاعرك مش من ضمنهم الأذى لا ليك ولا له!.. الحب اللي يدوس على كرامة أو يضر صاحبه أو يقلب الغلط صح؛ مالوش قيمة وخسارته هي أكبر مكسب.