محمد التاجي: ندمت على مشهد جريء في ديل السمكة.. ربنا سترها معايا والرقابة حذفت نصه
قال الفنان محمد التاجي، إنه رفض بعض المشاهد التي عرضت عليه لأنها جريئة، مشيرًا إلى أن هذه المشاهد لا تضيف للفن، وكل شخص سيحاسب على ما يفعله أمام الله.
وقال محمد التاجي لـ القاهرة 24: مش المشاهد دي اللي هتضيف للفن، كل واحد بقناعاته الشخصية وكلنا قدام الديان سنحاسب على كل شيء، والغريب أن بعض الفنانين والفنانات بيدافعوا عن المشاهد ، وبيجبروا غيرهم عليها، وكأن البعض علشان معيوب عاوز الناس كلها معيوبة زيه.
وأشار محمد التاجي إلى أنه رفض المشاركة في فيلم عمارة يعقوبيان بسبب مشهد جريء، مضيفًا: لازم الواحد يراعي ربنا وولاده والمجتمع اللي هو فيه، لأن النهاردة بحجة الفن والثقافة والإبداع الفني يظهر كل ما هو في غرف النوم وكأننا دخلنا تحت طائلة أفلام البورنو.
ولفت إلى أنه ندم على تقديم مشهد جرىء في فيلم ديل السمكة، مستكملًا: ما كررتش الموضوع وربنا سترها معايا والرقابة شالت منه ومارضيش ليا أني أكون بالإباحية دي.
واختم محمد التاجي حديثه موجهًا رسالة إلى الساخرين من مصطلح السينما النظيفة قائلًا: بقول للي بيتريقوا على السينما النظيفة اعملوا اللي أنتم عاوزينه، لكن ليه ألاقي واحدة بتقول اللي مش عاجبه يعتزل، مش أنتي اللي هتخليني أعتزل أنا براعي ربنا، لكن أنتي مش بتراعي حتى المجتمع، وإحنا القوة اللي هتقف في وش الانحلال باسم سينما الإبداع الفني.
