أعاني من الوحدة ومبقاش عندي أمل والمنتجين مايعرفونيش.. أبرز تصريحات صفية العمري التليفزيونية
فن
صفية العمري
حلت الفنانة القديرة صفية العمري، ضيفة في أحد البرامج التليفزيونية، وتحدثت عن بداية مشوارها الفني، كما كشفت عن كواليس أعمالها كما وجهت رسالة للمنتجين والمخرجين.
ويعرض لكم القاهرة 24 أبرز تصريحات صفية العمري التليفزيونية
- نازك السلحدار دي شخصيتي أنا، يعني أنا طول عمري كده من وأنا صغيرة ودي شخصيتي، نازك ماضفتش ليا حاجة، بالعكس أنا اللي ضفت ليها من روحي ومن شخصيتي أنا.
- مبيليقش عليا إني أغير شعري وطريقة لبسي، ليا ستايل معين وشكل مبعرفش أغيره بحس إن مش أنا.
- أنا معرفش أقدم برامج زي إعلاميين دلوقتي، إسعاد يونس لها شخصي لذيذة ولطيفة مينفعش حد يقلدها خالص.
- أنا بحب أوي المزيكا الكلاسيكية والأوبرا فكان ممكن أقدم برنامج عن الفن الراقي اللي يمشي مع شخصيتي.
- أنا شخصية خجولة جدًا مع إني لما بقف قدام الكاميرا بشوط.
- أنا عاملة 100 فيلم وعملتهم من غير شللية وكلهم منتجين ومخرجين كبار، أعمالي كلها مع أهم وأكبر منتجين سينما وتليفزيون في مصر.
- أنا معرفش معظم المنتجين دلوقتي ويمكن هما مبقوش يعرفوني خلاص، وده اللي بيحصل.
- أنا بعاني من الوحدة، وولادي ربنا يخليهم ليا بحاول قدر الإمكان إني أسافر عندهم في أمريكا، لكن فيه وحدة طبعًا والشغل كان بيلهيني.
- دلوقتي تركيز المنتجين على الفنانيين الصغيرين.
- مفيش مسلسل هيعيش زي مسلسل ليالي الحليمة وهوانم جادرن سيتي ورأفت الهجان والمال والبنون.
- ما زال عندي عطاء ولسة بقدر أشتغل، وعندي طموح ولكن قاهرنا ليه؟ يعني فيه حاجات بحلم إني أعملها في شخصيات وأدوار، المرأة المصرية ليها وجود هايل، ليه ميكتبوش لنجاح المرأة المصرية.
- مبقاش عندي أمل، لأن مش دول المنتجين بتوع زمان اللي بيعرفوا يختاروا الفنان المناسب للشخصية، أنا مش عايزة أظلم حد، ولكن إحنا مبقيناش مهمين بالنسبة لهم وملناش وجود.
- على أيامي مكناش بناخد فلوس خالص، يعني مبالغ ضئيلة جدًا، وكنا بنصرف على مظهرنا، يعني لبس الهوانم كله والحلمية أنا جبته على حسابي، تمن البرنيطة بس بسعر حلقة، مكناش بنفكر هنقبض كام لأنه كان الفن بالنسبة لنا هو الحياة.
- إحنا الفنانيين اللي أعمالنا بتتذاع كل يوم المفروض يبقى لينا عائد والحقوق بتاعتنا ناخدها لكن محدش مهتم.
- للأسف النهاردة فيه فنانيين كتير مرضى، هل ينفع إن الدولة هي اللي تعالج الفنان؟ أنا غضبانة جدًا.
- أنا بتكرم على ليالي الحلمية وهوانم جاردن سيتي لغاية دلوقتي لأن العمل عايش ومستمر والناس بتشوفه، وكل قناة عايزة تفتح بتبدأ بالحلمية.
- أنا اتكلمت كتير في موضوع حقوق الفنان في عرض المسلسل على القنوات ودخلت القانون، ولما البرلمان يفعل القانون يبقى ماشي، لكن محدش مهتم.
- البلاد العربية كها بتكرمنا لـ تاريخنا اللي عملناه الناس دي بتقدرنا.
- لازم نوقف الإنجاب الكتير.
- الجرائم الرهيبة اللي بنشوفها دي من وراء السوشيال ميديا، حرام ليه وصلنا للدرجة دي؟ النهاردة الشباب مبقاش عندهم طموح، الواحد حزين وزعلان على الشباب اللي أخد اتجاه غلط.
