ماجدة خير الله عن مقارنة فيلم حميدو بـ عبده موتة: أخلاق إيه اللي فريد شوقي حسنها؟
علقت الناقدة ماجدة خير الله على الجدل المثار مؤخرًا بسبب مقارنة الفنان محمد رمضان فيلم عبده موتة بـ فيلم حميدو للراحل فريد شوقي.
وقالت ماجدة خير الله لـ القاهرة 24: مفيش حاجة اسمها فيلم يفسد أو يصلح أخلاق الناس، فيه فيلم حلو وفيلم وحش زي ما فيه أفلام المافيا وفيلم الأب الروحي اللي حقق نجاح كبير مع إن كله قتل وعصابات ليه محدش انتقده؟ وفيلم ناجح ومكسر الدنيا.
ماجد خير الله: الفن يا حلو يا وحش اللي أخلاقه وحشة هيفضل كدا
وواصلت ماجدة: الفن يا حلو يا وحش اللي أخلاقه وحشه هيفضل كدا، زي ما مفيش حد كويس ومتربي بيطلع يقتل بسبب فيلم، المشكلة أننا مجتمع مش عارفين مشاكلنا جاية منين وبندور على حاجة نرمي عليها مشاكلنا وأزماتنا ودا استسهال إيجاد حلول للمشاكل.
وأضافت ماجدة خير الله: هل فيه فيلم بيحكي قصة واحد راح يخطب واحدة ورفضته وقرر يدبحها؟ ومع ذلك دي ظاهرة موجودة في المجتمع ملهاش علاقة بالفن.. والمجتمعات هي اللي بتفرض العنف نتيجة ظروف اقتصادية واجتماعية ومش كل حاجة هنقول أصل السبب السينما والفن.. ومحمد رمضان مش بـ أهمية إنه يفسد جيل ولا غيره بأهمية إنه يصلح جيل وفريد شوقي أخلاق إيه اللي حسنها؟ مفيش حاجة اسمها كدا.
ومن ناحية أخرى، أثار محمد رمضان جدلا واسعا على مواقع التواصل الاجتماعي بعد انتقاده لـ قصة فيلم حميدو ووصفه بأنه أشد خطورة من عبده موتة لأن فريد شوقي كان تاجرًا للمخدرات في الفيلم وارتكب الفاحشة مع إحدى الفنانات خلال أحداث الفيلم وبعد حملها قرر قتلها.. ولذلك هو أصعب من قصة عبده موتة.
