بسبب انخفاض الأسعار.. المصريون يلجأون للشراء من أمازون اليابان وفرع الشركة بالقاهرة في ورطة
تصدر وسم أمازون اليابان تريند موقع التواصل الاجتماعي فيسبوك، حيث ازداد حديث مستخدمي الموقع حوله، في الساعات الأخيرة.
وجاء في منشور: مجموعة من المصريين دخلوا على موقع أمازون اليابان، واشتروا نفس المنتجات اللي موجودة في أمازون مصر، وطبعا بعد ما درسوا إن المنتجات دي بعد الجمارك والضرايب أقل من سعر مصر.
أمازون اليابان أرخص من أمازون مصر
وذكر منشور آخر: أمازون اليابان أرخص بكتير من أمازون مصر، دلوقتي أيفون 8 في مصر عامل بتاع 6 آلاف جنيه مصري، وفي اليابان 22،840 ين ياباني أي يساوي 3 آلاف وشوية، والمبلغ بالجمارك وانت كل اللي بتعمله بتدفع من الفيزا بتاعتك وبتستنى والحاجة بتوصلك لغاية عندك بدون ما تدفع مليم زيادة.
وقال ثالث: أمازون اليابان عاملين خاصية الشحن الدولي، يعني ادخل امازون تغير الدولة لليابان وتطلب التوصيل لمصر، وامازون بتدفعك جمرك 14% فقط ولو الجمارك زادت عن كده، هما اللي بيدفعوا، وانت مالكش فيه، والجمارك ف الاول بمعنى ان المبلغ اللي بيكون مكتوب لما تيجي تعمل تشيك اوت مش هتدفع اكتر منه ويوصلك لغاية باب بيتك.
الموضوع اتقلب لـ تجارة
وأكمل: المشكله ان الموضوع قلب لـ تجارة، والتُجار في مصر، بقوا يدخلوا يشتروا كميات، لدرجة أن العروض بتخلص، وعدد الشحنات لمصر مثلا في اخر شهرين تخطي 300 الف شحنه، ف غالبا وقريب جدًا، امازون هتاخد بالها من الموضوع ده وتقفله، وهو مفتوح الى الآن، وفق ما ذكره منشور.
وذكر آخر: ولكن في بعض الناس استغلوا الحوار وخدوا الموضوع سبوبه، كل واحد بقى يشتري تسع ولا عشر كروت ويخلص على كل العروض ويبيعها هنا ويكسب فيها ألف ولا ألف ونص، المفروض إن أمازون ده للمستهلكين مش للتجار، يعني العروض دي بتتعمل علشان المستهلك العادي اللي هو فعلًا محتاج المنتج ده يلحق يشتري ويستفيد من العروض والخصومات، إنما أنت تاجر ومتهرب من الضرائب كمان وبتخلص على كل الكروت اللي هي المفروض موجهة للمستهلك، وطبعا لما الطلب بيزيد على منتج معين سعره بيزيد، وبالتالي لما يجي المستهلك يشتري كارت شاشه مثلًا هيلاقي سعره زاد والتاجر اللي خد كل القطع هو الوحيد اللي استفاد من العرض.
وأضاف: حاليًا في ناس كانت بتحاول تطلب كارت من amd نوع من أنواع كروت الشاشة، وكان مكتوب إن المنتج ده مش بيتشحن لمصر بعد ما كان بيتشحن بالفعل، ف الحقيقة إحنا يعني أعداء لنفسنا، يعني لو الموضوع فيه ضرر على التاجر هنقول ماشي هو حر بقى يكسب يخسر ملناش فيه، لكن دا ضرر واقع ع الكل، الناس ما صدقت لقت منفذ بس علشان الطمع والجشع اللي شايفينه هنا من أسعار مبالغ فيها، طب تخيل اللاب هنا الزيادة بتوصل لـ 12 ألف، يعني اللاب اللي بـ 20 ألف مثلًا على أمازون اليابان تجيبه من مصر بـ 32 او 36 ألف.
