مظهر شاهين: رفضت ارتداء ابنتي الحجاب لهذا السبب
قال الشيخ مظهر شاهين، الداعية الإسلامي، إنه يرفض أن ترتدي ابنته الحجاب في هذا العمر، حيث تبلغ من العمر 9 أعوام فقط، مبينًا أنه يريدها أن تنعم بحياتها وطفولتها.
وكتب الشيخ مظهر شاهين، عبر حسابه الشخصي بموقع التواصل الاجتماعي فيسبوك: أرفض إن بنتي تتحجب دلوقتي، عارفين ليه؟ احتفلنا بالأمس بعيد ميلاد ابنتي، ولأنَّي معَوِّد أولادي على المفاجآت اللي تفرحهُم، همَّا كمان بيحبوا يعملولي مفاجآت تفرحني، المُهم، بنتي قررت تعمل لي مفاجأة في اليوم ده تفرحني بيها، فكَّرِت وفكَّرِت ثم قرَّرَتْ أن ترتدي الحجاب، وبالفعل لقيتهَا حاطة إيشارب على راسها، وهي فاكرة إن دي مفاجأة حلوة هفرح بيها، إلا أنَّنِي فاجأتُها بإنِّي رافض إنها تتحجب دلوقتي.
مظهر شاهين يوضح سبب رفضه ارتداء ابنته الحجاب
وأضاف شاهين: قلتلها الحجاب جميل يا حبيبتي، وربنا بيحبُّه لكن إلبسيه لما يبقي سنك 13 سنة، أو لمَّا ماما تقولك، عشان تعيشي طفولتك وتشبعي بيها.
وأوضح الشيخ مظهر شاهين، أن عمر ابنته الآن هو 9 سنوات فقط، منوهًا بأنه يرغب في جعلها تعيش وتفرح بطفولتها بدون أي قيود، موضحا: يوم ما تتحجب تتحجب وهي عاوزة كده وفاهمه يعني إيه حجاب، مش عشاني أنا، وسبحان الله لما أنا فكرْت وجدْت إن ربنا سبحانه وتعالي عاوز كده، ربنا عاوز الأطفال يفرحوا ويمرحوا بدون أي قيود، عشان كده رفع القلم عنهم ومش بيحاسبهم عللا أفعالهم لحد ما يوصلوا لسن البلوغ، ساعتها بيبقوا مكلَّفين وبيتحاسبوا على تصرفاتهم.
في الوقت ذاته، نوه شاهين باستحباب تدريب الأطفال على الصلاة والحجاب والصوم وفرائض الإسلام كاملة في سن مبكرة، وذلك مع منحهم أكبر فرصة مُمكنة يعيشون بها طفولتهم، حتى لا يشعرون بالحرمان بعد التكليف.
