صفاء جلال: اخترت أتجوز راجل شرقي وأمشي على هواه
تحدثت الفنانة صفاء جلال عن زواجها، مشيرة إلى أنها تزوجت في سن الرابعة والعشرين من رجل شرقي.
اخترت بيتي وزوجي وبناتي وبعدين شغلي
وقالت صفاء جلال خلال لقاء تليفزيوني لها: طول ما فيه مودة ورحمة، الدنيا هتمشي، كل واحد فينا عنده مشاكل بيرجع بيها البيت، وبتحاولي تعملي توازن وتحاولي تحتوي جوزك وولادك حتى لو اتخانقنا إحنا مش ملايكة طالما بنحب بعض وبنقدّر بعض.
وأضافت جلال: كل واحد فينا بيختار على حسب أولوياته، في واحدة أولوياتها تكون نجمة، وبتشوف أن شغلها بيديها الإحساس بالسعادة وكل شيء، وفي حد تاني بيختار البيت وفيه ناس بتختار الاتنين وأنا اخترت البيت وزوجي وبناتي وبعدين شغلي.
زوجي بيعمل كل حاجة علشان يبسطنا
وأوضحت: اتجوزت وأنا عندي 24 سنة واخترت أتجوز راجل شرقي وأمشي على هواه، وهو بيحاول يعمل كل حاجة علشان يبسطنا، ولما بيلاقيني بنجح بيشجعني وبيكون فرحان، والحياة الزوجية شراكة، والحمد لله بعمل شغل كويس ومش بيأثر على حياتي وبيتي وبناتي.
واستكملت صفاء جلال: 90 في المائة من صحابي مطلقات لأنهم ما عرفوش يتعاملوا ويتوافقوا، وفيه رجالة عاوزة الحرق.
بحاول أوصل لشكل معين الناس تتقبله
من ناحية أخرى، تحدثت الفنانة صفاء جلال عن بعض العمليات التي خضعت لها من أجل التخسيس، مشيرة إلى أنها خضعت لعملية نحت قوام في السابق، قائلة: بعد سن الأربعين قابليتك لنزول الوزن بتكون قليلة علشان كده بحاول ألحق نفسي وأشتغل على نفسي وأروح الجيم وأعمل عمليات، وعملت عملية نحت من فترة، لأني كنت تخنت بشكل كبير، وبعد فترة سبت نفسي وتخنت تاني وخدت كبسولة المعدة علشان كنت بأكل كتير وعندي مشكلة في الأكل بالليل، وخسيت 15 كيلو وبكمل دايت وبروح الجيم.
وأكدت أن الرجيم وعمليات التخسيس تشكل مجهودًا كبيرًا على أي سيدة، خصوصا من تخطت 45 عامًا، مضيفة: بعمل ده لأن الناس بتتخض لما تشوفني على الرغم من أنه عادي إني أتخن لأن أنا ست من حقي آكل وأشرب، لكن الناس متعودين عليا أني رفيعة وفي جميع أعمالي اللي قدمتها كنت 63 كيلو، وطول الوقت بحاول على قد ما أقدر أوصل لشكل معين الناس تتقبله.
