عشموه وخليو بيه.. لاعب مصر المقاصة يعلن ابتعاده عن كرة القدم بسبب المصري والإسماعيلي
أعلن محمد عادل أمو لاعب مصر المقاصة، ابتعاده عن كرة القدم نهائيًا، بسبب أزمة حدثت مع ناديي المصري والإسماعيلي.
أزمة لاعب مصر المقاصة
وقال محمد أمو لاعب المقاصة، عبر حسابه على موقع التواصل الاجتماعي فيسبوك: فاضل ساعات على القيد وأنا مخلصتش في أي مكان بعد ما مضيت في فرقتين مصري وإسماعيلي وكنت بتعامل مع كل الناس بثقة كبيرة جدًا مضيت للمصري وفضلت منتظرهم يدفعوا شيكات النادي ويخلصوني.
وأضاف محمد عادل أمو: أنا مضيت للمصري قبل كابتن إيهاب ما يمسك الفرقة أول حاجة قولتها لوكيلي بعد كابتن إيهاب ما بقي المدير الفني قولتلو أنا مستعد أتنازل عن أي حاجة بس أروح مع كابتن إيهاب أي حد يعرفني يعرف إني بحب كابتن إيهاب جلال جدا جدا وإن كابتن إيهاب اكتر واحد ساعدني في حياتي.
وتابع لاعب مصر المقاصة: قعدت أكتر من أسبوعين منتظر المصري يدفع الشيكات لما حسيت إن مبقاش في اهتمام من المسؤولين في المصري كلمت وكيلي قولتلو هروح أي مكان تاني قالي الإسماعيلي عايزك وأنا بحب الإسماعيلي جدا جدا وافقت على طول وقعدت مع البشمهندس يحيي الكومي.
وأكمل لاعب مصر المقاصة: مضيت واتفقت على فلوسي وكانت المشكلة فلوس النادي بس عملت كل حاجه ممكن أعملها قالولي هتستني على فلوسك عشرين يوم قولتلهم ما فيش مشكله عادي ادفعو فلوس النادي وخلصوني ومش هنختلف على أي حاجة اللي حضراتكم عايزينه أنا هوافق عليه عشان أحقق حلم من أحلامي وألعب في النادي الإسماعيلي.
وواصل لاعب المقاصة: كنت مستعد أعمل أي حاجه عشان الموضوع يتم خلينا النادي بتاعي يوافق على إنه ياخد الفلوس أقساط مع إن النادي في ظروف صعبة ومحتاج كل جنيه عشان يقدر يحل أزمته ويفك القيد.
وأوضح محمد عادل أمو: عملت كل حاجه عشان الإسماعيلي يطلعوا شيكات النادي وكانت كل حاجه فعلا كويسة آخر يوم في القيد قالو لوكيلي مش هنقدر نخلص عشان ما فيش في النادي فلوس.
وأكد اللاعب: أنا حاليا مروحتش نادي كلمت كل أندية الدوري كل الأندية قفلت القائمة بتاعتها ربنا يسامح كل الناس اللي كانت سبب في اللي أنا وصلتلوا ده أنا قررت ملعبش كورة مرة تانية وبشكر كل الناس اللي حاولت تساعدني وأتمنى ميكونش في أي شخص زعلان مني وبشكر وليد هويدي والنادي بتاعي ربنا معاكوا ويوفقكم وإن شاء الله تصعدو مرة تانية.
واختتم محمد أمو: أنا واثق جدا إن اللي حصلي ده خير وراضي جدا لكن لأسباب شخصية أنا مش هقدر ألعب كورة مرة تانية.
