سعيد شيمي: التصوير في الشوارع المصرية أصعب ما يكون.. وبنصور سرقة
كشف مدير التصوير سعيد شيمي، كواليس فيلم سواق الأتوبيس، مؤكدًا أن التصوير في مصر من أصعب الأشياء، بجانب الحديث عن سيناريو فيلم ضد الحكومة.
وقال سعيد شيمي خلال ندوة فيلم سواق الأتوبيس بمسرح الهناجر في دار الأوبرا المصرية: التصوير في الشوارع المصرية من أصعب ما يمكن، أن أحنا نظهر جامعة الدول العربية في المشهد الأخير لفيلم سواق الأتوبيس دا مش مقصود، ولكننا كنا بنصور سرقة، وأغلب المشاهد اللي بتتصور في الشارع بتكون مرة واحدة مش بنعيدها تاني.
وأشاد سعيد شيمي بـ سيناريو فيلم ضد الحكومة، قائلا: بشير الديك هو الدينامو في الكتابة وفي الجيل بتاعنا، والناس لما بتقابلني بيكلموني عن خطبة أحمد زكي في فيلم ضد الحكومة، وبقول لهم ده مش أحمد زكي ده كلام بشير الديك المؤلف.
وأعرب سعيد شيمي عن إعجابه بالفيلم التسجيلي أبطال من مصر والذي يسلط الضوء على جهود الجيش في حرب أكتوبر، قائلا: أنا تأثرت بفيلم أبطال من مصر لدرجة إني بكيت بسبب معاناة الأمهات اللي بيفقدوا أولادهم، ولازم نعمل أفلام أكتر عن حرب أكتوبر؛ لأن الأفلام اللي عندنا مش كفاية.
كما أكد سعيد شيمي أن السوشيال ميديا بها شائعات كثيرة وخاصة عن الأفلام، قائلا: السوشيال ميديا كلها كدب وسمعت شائعة بتقول أن مساعد المخرج عاطف الطيب هزق عماد حمدي، ودا مش حقيقي لأن مساعدين عاطف الطيب كلهم محترمين.
