استولى على 3 ملايين ورجّع الناس من المطار.. ننشر أقوال أحد ضحايا مستريح الحج والعمرة | خاص
استولى أحد الأشخاص يدعى وحيد.ر المعروف إعلاميا بـ مستريح الحج والعمرة، على مبلغ 3 ملايين ومائتي ألف جنيه من أهالي محافظة الأقصر، بحجة إصدار تأشيرات الحج والعمرة لهم، وتنظيم رحلات عمرة خلال شهر رمضان، من خلال إنشاء وإدارة حساب على موقع التواصل الاجتماعي فيسبوك، ولكن اكتشف المعتمرون خلال وجودهم بمطار الأقصر بإلغاء رحلتهم للعمرة والنصب عليهم، وحقق المتهم ثروات طائلة، وأغلق فروع شركاته، مما اضطر الضحايا إلى تقديم شكاوى ضده، وتم القبض عليه وإحالته للمحاكمة الجنائية وصدور حكم ضدة بالحبس 3 سنوات وغرامة مالية بتمهة إنشاء بوابة لرحلات الحج دون تراخيض وغرامة 50 ألف جنية لكل معتمر.
مستريح الحج والعمرة
وحصل القاهرة 24 على نص أقوال أحد ضحايا مستريح الحج والعمرة وقال: اللي حصل إن أنا مقيم بإسنا في الأقصر، وبتردد على القاهرة للعمل، ونتيجة لكده تم توكيلي من ناس قرايبي في البلد في إني أوصّل فلوس لشركة سياحة مقابل تنظيم رحلات عمرة، وفي شهر مارس تعرفت على شخص اسمه ا.ع من البلد عندنا، وقالي انه شريك لشخص اسمه و.ر في شركة، وبينظم رحلات مع مكاتب سياحة، فوصّلني لمكتبه صاحب شركة محاسبة ومشرف على شركات سياحة كتير، ونزلت روحتلهم المكتب وهناك قابلت المدعو ا. ع وأخدت معايا جوازات السفر لناس قرايبنا من البلد، وعددهم 12 جواز سفر، ومبالغ مالية وسلمتهم لصديقي علشان يعملنا تأشيرات، وتنظيم برنامج رحلات عمرة كامل، وبالفعل التأشيرات طلعت والناس سافرت عملت العمرة ورجعت بعدها، وكان في ناس تاني عاوزة تطلع تعمل عمرة خلال شهر رمضان.
أقوال أحد ضحايا مستريح العمرة
وأضاف ضحية مستريح الحج والعمرة: كلمت ا. ع وكلمت و. ر واتفقوا معايا أحولهم فلوس مقابل إنهم يسفّروا مائة شخص من قرايينا في البلد، وطلبوا مني أحوّل الفلوس على حساب بنكي باسم ا.ع ودي زوجة ا.ع، عن طريق فودافون كاش، وثلاثمائة وخمسين جنيه، وأنا بعتلهم فلوس على الحسابات دي بمبلغ خمسائة وسبعين ألف جنيه عن طريق البنك، وبعتلهم مائة جواز سفر عن طريق مندوب، ووصلهم للمكتب نزلت المكتب بعدها اتعرفت على و. ر واللي عرفني إن هو مشرف على شركات سياحة، وإنه نظم رحلات عمرة كتير هو وا. ع بصفته شريكه، عن طريق شركات سياحة تابعة للمخابرات وسلمت في اليوم ده مبلغ مائتين خمسة وسبعين ألف جنيه أخدهم مني «و.ر» و«ا. ع» كان موجود واداهم لموظف الخزنة، ورجعت الأقصر حولت مبلغ ربعمائة وخمسين ألف جنيه لحساب بنكي باسم شركة وي للتوريدات العمومية بناء على طلب و. ر اللي قالي إن دي شركته.
ضحايا مستريح العمرة: الناس رجعت بيوتها وخسرت فلوسها
واختتم ضحية مستريح الحج والعمرة: بعد كدة فوجئت بـ ا.ع وزوجته بعتولي تأشيرات عمرة على الموبايل، وقالولي إنهم هيبعتوا أتوبيسات تنقل الناس للمطار، وبالفعل كان يوم 15 رمضان جت أتوبيسات والناس ركبوا وهما في الطريق ا. ع كلمني، وقالي إن حصل مشكلة في الجوزات، ومش هنعرف نسفرهم النهارده نزلهم في فندق في سوهاج لحد لما نحل المشكلة، وقعدوا يماطلوا في الموضوع لحد لما الناس رجعت بيوتها من الفندق والتأشيرات مدتها خلصت، ومن هنا حصلت المشكلة ونزلت أكتر من مرة على مكتب و.ر وطالبته إنه يرجع الفلوس، واتصلت بالنجدة وعملت البلاغ بالفلوس اللي دفعتها، قعد يماطل معايا لحد لما عرفت لما نزلت الشركة إنه سافر بره ورفض موظفين الشركة ردّ أي فلوس.
