أميرة عبد العظيم: كنت حريصة على استضافة كبار نجوم الفن.. وصليت ركعتين علشان عادل إمام يوافق ييجي البرنامج
تحدثت الإعلامية أميرة عبد العظيم، عن بدايتها في المجال الإعلامي، مؤكدة إنها كانت حريصة على استضافة كبار نجوم الوسط الفني حتى تلاقي نجاحا كبيرا وتستمر على هذا المنوال طوال مشوارها المهني.
أميرة عبد العظيم تصلي ركعتين قبل استضافة عادل إمام
وعلقت أميرة عبد العظيم، على تصريحاتها السابقة بشأن صلاتها قبل استضافتها للفنان عادل إمام، وقالت في حوار تلفزيوني: الموضوع خد أكبر من حجمه، هو إحنا مش بنستعين بالصلاة على قضاء حوائجنا؟ وعادل إمام كان أول حلقة ليا في البرنامج، وأنا كنت عايزة أبدأ بالتوب علشان بعد كده كل النجوم اللي يجولي يبقوا Class a، لكن لو بدأت صغيرة هفضل صغيرة، وعادل إمام مكنش بيروح برامج، وكنت قلقانة إنه ميوافقش رُحت صليت ركعتين وكلمته قالي موافق.
شعر أميرة عبد العظيم يمنعها من تقديم نشرة الأخبار
وفي سياق آخر، كشفت أميرة عبد العظيم، عن سبب عدم تمكنها من تقديم نشرة الأخبار بالتلفزيون المصري، موضحة أن لون شعرها الأشقر منعها من تحقيق حلمها على حد قولها: والدي كان كل ما يشوف الدكتورة درية شرف الدين قارئة نشرة الأخبار العظيمة، يقولي تعالي أنا نفسي أشوفك زيها، لما قدمت في التلفزيون قدمت إني أبقى مقدمة نشرة الأخبار.
وتابعت الإعلامية أميرة عبد العظيم: لما رُحت لجنة الاختبار لقيت ناس عمالقة زي أنيس منصور، وأحمد سمير، وسمير التوني، وسامية صادق، اسماء تخض، وكل واحد سألني وامتحنوني، وبعدين أستاذ أحمد سمير، قالي أنا شايفك أكتر في برامج المنوعات سيبك من حكاية نشرة الأخبار دي، أنا حسيت إن حلمي وقع.
وأضافت: أنا فيما بعد سألت نفسي هما ليه موافقوش إني أقدم نشرة الأخبار، لقيت إن فيه مقاييس لـ قارئة الأخبار، إن لازم يكون شعرها إسود، وجادة شوية، والملامح تكون جادة، وهما لقوني ملونة وشعري أصفر وقالوا لأ دي متنفعش، وأنا بفسر لـ نفسي، ودلوقتي المقاييس اختلفت، وبقيت أشوف موديلز بيقرأوا الأخبار.
