محمد مصيلحي يكشف سبب فشل عودة رزاق سيسيه للاتحاد بعد رحيله عن الزمالك
تحدث محمد مصيلحي، رئيس نادي الاتحاد السكندري عن فشل عودة رزاق سيسيه لصفوف زعيم الثغر مرة أخرى بعد رحيله عن الزمالك.
وقال مصيلحي في تصريحات تلفزيونية: اللي شايفه من تواجد أندية المؤسسات والشركات والأندية الخاصة، أعتقد ده ممكن يقلل من قوة الأندية الشعبية، وإزاي لاعب كورة يوصل سعره لـ16 مليون جنيه.
تصريحات محمد مصيلحي
وأضاف محمد مصيلحي: رزاق سيسيه لما مشي من الاتحاد وراح الزمالك مات، وفتحت حوار معاه في شهر أغسطس لكنه كان حابب الاحتراف برا مصر في الخليج، لما ابتديت اتكلم معاه طلب 500 ألف دولار قبل ما يروح البنك الأهلي، ووصلنا لـ 600 ألف دولار.
وأكمل مصيلحي: راح البنك الأهلي بـ12 مليون جنيه، والبنك الأهلي دفع للزمالك 5 أو 6 مليون جنيه، يعني اللاعب كلف البنك الأهلي 18 مليون جنيه، هل نادي الاتحاد وأي نادي شعبي يستحمل دفع المبلغ ده؟
في سياق آخر، رد محمد مصيلحي، رئيس نادي الاتحاد السكندري على الانتقادات التي وجهت له من جماهير الزمالك بعد انتقال أنس أسامة إلى صفوف سلة الاتحاد.
وقال مصيلحي: في ناس متعرفش عمق العلاقة التاريخية بين الزمالك والاتحاد، والمستشار مرتضى منصور هو رئيس النادي الوحيد اللي دعم الاتحاد خلال السنين اللي فاتت؛ بسبب حبه لجماهير الأندية الشعبية.
وواصل مصيلحي: لما وقعت مع أنس أسامة ماكنش مرتضى منصور موجود، ووقعت معاه من أكتر من سنة، والعقود كانت معايا في مكتبي، وحصل على مليون جنيه من أكتر من سنة وكنت متأكد إن قانونا أنا ماشي صح.
واختتم حديثه قائلا: من ذكاء مرتضى منصور، إنه استوعب الموضوع وجه القرار إن أنس أسامة في نادي الاتحاد، وكان لازم أطلع بيان اعتذار بعد التجاوزات اللي معدتش ثواني معدودة، وكلمت مرتضى منصور بعدها واستوعب الموضوع، اللي تجاوز في حق نادي الزمالك قلة وجماهير الاتحاد تقدر ما يفعله مرتضى منصور مع نادي الزمالك.
