عمر خيرت: نجحت في مشروع الموسيقى الخالصة.. وبعمل حفلتين شهريًا بحضور كامل العدد
قال الموسيقار عمر خيرت إنه سعيد بتفاعل جمهور الأوبرا مع حفلاته دومًا، وذلك على هامش حفله بمهرجان الموسيقى العربية في دورته الـ 31.
وأضاف خيرت في حواره مع الإعلامية أميرة العادلي على قناة الحياة، أنه سعيد بنجاح مشروعه في نشر الموسيقى الخالصة، قائلا: الحمد لله إن مشروع الموسيقى الخالصة نجح.. ده كان هدفي ووصل للنور بالنسبة للناس.. ده الاتجاه اللي أخدته على عاتقي.
وتابع عمر خيرت: كان في ناس مستغربة لأننا شعوب بتهتم بالكلمات مع الأغنية.. وده مش غلط.. الموسيقى الخالصة قالب من القوالب الموسيقية كنا نفتقر إليه لأن الاهتمام كان بالغناء.. الموسيقى الخالصة بتخاطب وجدان البشر وبتسيب الإنسان لوحده يتخيل ما يحب أن يتخيله.. ما بتحددوش بكلمة.
وعن إقبال وتفاعل الجمهور مع حفلاته، أشار عمر خيرت إلى أنه يقوم بعمل حفلتين شهريا، ويكون الحضور كامل العدد دوما.
أما فيما يتعلق بالتحضيرات قبل الحفلات، قال: أي حفلة ببقى حامل الهم وده اللي بيخلي الفنان ينجح إنه يبقى عامل حساب للمستمعين والمشاهدين وإن دايما يبقى عند حسن ظنهم.. مبتكلمش كتير قبل الحفلات وبدعي ربنا طبعا إن الحفلة تعدي على خير.
وأردف الموسيقار الكبير: تفاعل الجمهور حاجة تفرح.. أي فنان بيسعد بلقاء الجمهور وتقبلهم للموسيقى بتاعته، لأنه ده بيظهر قد ايه المشروع نجح.
