شيرين عن عادل إمام: منهم لله اللي موتوه ألف مرة ويا رب يعيش 180 سنة عشان يخذلهم
أعربت الفنانة شيرين عن استيائها الشديد من الشائعات التي تخرج من حين لآخر على الزعيم عادل إمام، والتي تزعم وفاته، داعية الله أن يمد بعمره حتى يخذل جميع من أصدروا هذه الشائعات.
وقالت شيرين لـ القاهرة 24: منهم لله ألف مليون مرة اللي موتوا عادل إمام ألف مرة، حسبي الله ونعم الوكيل، وأنا بكلمه على طول وبطمن عليه، ويا رب الزعيم يعيش 160 أو 170 أو 180 سنة ويخذل الناس كلها.
وأضافت شيرين: الأعمار بيد الله، لكن كفاية الناس تكون هيفا وفاضية، الناس زمان كانت بتقرأ الجرنال وتعرف وتتثقف ولكن للأسف دلوقتي الناس معلوماتها من السوشيال ميديا، زمان قبل السوشيال ميديا كنا مثقفين.
شيرين تدعم شيرين عبدالوهاب:
ومن ناحية أخرى، حرصت شيرين على دعم شيرين عبدالوهاب، بعد أزمتها الأخيرة ودخولها أحد المستشفيات للعلاج من إدمان المخدرات.
وقالت شيرين لـ القاهرة 24: بقول لشيرين كلنا بني آدمين وبشر، وكلنا بنغلط، وأنتِ صوت جميل وربنا إداكي موهبة وهتقومي وترجعي لجمهورك وبناتك وتفرحي بيهم، مضيفة: أنا شايفة إنها كانت المفروض تتعالج نفسيًا منذ طلاقها من زوجها الأول، لأنها هي طلعت في كذا برنامج وعيطت وقالت أرجوك ما تسيبنيش، هي من زمان المفروض كانت تتعالج نفسيًا علشان نفسيتها تقوى، في ناس بتشوفيها زي العمارة الهايلة لكن من جوة نفسيتها هشة.
وأكدت أن شيرين تمتلك موهبة عظيمة وعبقرية ولديها صوت قوي لكنها لا تجيد الحديث، موضحة: لكن مش بتعرف تتكلم وده مش عيب، ولكن مطلوب منها تغني فقط، وحضرني موقفًا للست فيروز ربنا يديها الصحة الأستاذ عاصي الرحباني قال لها ما ترديش على التليفون تاني، لأنها صوتها هايل لما بتغني ولكن صوتها لما تتكلم أجش، علشان كده هي مالهاش حوارات وده مش عيب لما الفنان يكون عنده عيب معين لازم يخبيه، لو رجلي وحشة ما ألبسش قصير.
